دُعائیں
نِکے ویلے وݙیاں دُعائیں ݙیندیاں ہَن ، شالا جیویں ،خیر ہووی ، جتھ پیر ہووی اُتھ خیر ہووی ، شالا ٻڈھڑا تھیویں ، اللہ اوکھے ویلے توں بچاوے ، نت مراداں پوریاں تھیون ، شالا جیویں تے لکھ تھیویں ،اللہ ہر دے پردے کڄے، ایمان دی سلامتی ہووی ، اللہ نبی وارث ہووی،اللہ ٻیڑی پار پُڄاوے ، شالا کوسیاں نہ لڳنی ، بخت تے تخت دی خیر ہووی ، اللہ کہیں دا متھاج نہ کرے ، شالا جندڑی جیویں ، دشمن دا وار خطا تھیوے ،شالا جھوکاں وسدیاں رہن ، چڑھی کمان ہووی ،اللہ سب دے پردے کڄے،شالاگھوٹ تھیویں ، صحت دی بادشاہی ہووی ، قرآن وسیلہ ہووی ، شالا کھیر کھنڈ تھیوو۔ٻیاں وی دُعائیں ہوندیاں ہَن ، نِکے ٻالیں کوں دُعائیں وݙیاں وی ݙیندیاں ہَن تے وݙے وی۔ہُݨ دُعائیں ݙیوݨ آلے گھٹدے ویندن ،ڳالھیں یاد اَمدین تاں دِل کریندے جو ولا اوہو ویلھا وَل آوے ۔
حوالہ
[لکھو | ماخذ وچ تبدیلی کرو]کتاب: مُہاڳ، مصنف: ظہور احمد دھریجہ ، ناشر: جھوک پبلشرز ، ملتان