دوست مشتاق گاڈی دے ہک کمنٹ سانگے

دوست مشتاق گاڈی دے ہک کمنٹ سانگے ............................................................

تساں ہک وڈے گھیر وچ گالھ کیتی ہے ' سمجھ آندی ہے ہکا گالھ عرض کرنی ہے جو حملہ آور تے مقامی بندے دی کلا (فن) دی اٹکل اصلوں وکھری ہے ' تساں آپ جانڑدے ہو جو میں بادلیئر دا ہک وڈا مداح ہاں اوں کنوں بہوں کُجھ سکھے ' اوندے بیلڈز(بُرائی دے پُھل) توں نثری نظماں (پیرس دا بھوگ) تئیں اوندی اٹکل دے وٹاندرے کوں سمجھنڑ دی کوشش کیتی ہے 'بادلیئر دی ہک نظم ہے شاید " بندر گاہ " جیں وچ اوہ آہدے بندر گاہ تے دُھپ ہے کستوری گرم صالحے تے تارکول دی خوشبو ہے ' فرانس کیتے ہک روشن ڈینہ ہے ' بادلیئیر کوں ایہ پتہ نہ ہا جو کستوری دے پِچھوں کیڑھے ہرناں دی موت تے اوندے نافیاں دا المیہ ہے ' اوہ نہ جانڑدا ہا جو ایں گرم مصالحے دی خوشبو پچھوں انڈونیشیا تے ملائشیا وچ تھیونڑ والا قتلام کھڑے ' بادلیئیر فرانس دی استعماریت وچوں جنم پیا گھندا ہا ' مقامی / تل وطنی دا قصہ بیا ہے ' تہاڈا اپنڑا ایں تے بہوں وڈا مطالعہ ہے ' اج توں پنجویہ سال پہلے ارشاد تونسوی جیڑھے ویلے پیا آہدا ہا ' ایں وسوں وچ شاعری دا ویلا مُک گئے تیں اوہ غلط پیا آہدا ہا ' استعماری/ قابض قومیں دی شاعری دا ویلا مُکدا پیا ہا ' استعمار زدہ / مفتوحہ قومیں دی شاعری دا ویلا شروع پیا تھیندا ہا ' دنیا جہان دے دھرتی جائیاں دے نال نال سرائیکی وسوں اپنڑی اکھ پئی لاہندی ہئی۔ رفعت عباس