دوستی بس دے ٹکٹ

قاعدے موجب ویزے آوݨ دے بعد ساکوں دوستی بس دے ٹکٹ مِل سڳدے ہَن کیوں جو ساکوں واہگہ بارڈر دوستی بس دے ذریعے اِی پار کرݨاں ہا ۔ یارھاں اگست کوں ویزے لڳے ‘ 12؍اگست کوں ساکوں ملے ۔13؍اگست کوں مشاعرہ ہا۔ پتہ لڳا جو کم از کم پنج ݙینہاں بعد دے ٹکٹ مِل سڳدِن۔14؍اگست  دا ݙینہ گزار کے رات کوں ظہور دھریجہ لہور روانہ تھئے ۔ مجاہد بھٹی ساݙے پاسپورٹ تے ویزے چا کے لہور آ ڳئے ۔15؍اگست کوں بس دے ٹکٹ بُک کرائے ڳئے اَتے 20؍اگست دے ݙہ ٹکٹ مِل ڳئے ۔ 16؍اگست کوں ظہور دھریجہ ملتان وَل اَئے ۔ اُنہاں دے کول ساݙے پاسپورٹ تے ویزے تاں ہَن پر ساݙے اصل شناختی کارڈ سئیں فرید پیرزادہ کول رَیہ ڳئے ہن۔ ساݙے کول پروگرام گزر ونڄݨ دے بعد انڈیا ونڄݨ دا جواز تاں نہ ہا پر سنگت سوچیا جو ہندوستان دا عام ویزا ݙڈھ مہینے وچ مِلدے تے ساکوں ٻارھاں ݙینہاں وچ ویزا مِل ڳے ۔ایہ ٻہوں وݙا کم ہے ۔تہوں ویزے ضایا نہ کرو بلکہ ضرور ہندوستان ڄلو بھانویں سیل کیتے اِی سہی۔ سیاݨے ’’آہدن جواَڄ کل یو ۔ ایس ۔ اے دا ویزا مِل ویندے پر ہندوستان دا ویزا نہیں مِلدا تہوں وی ایں ویزے کوں نعمت سمجھ کے قبول کرو اَتے ایکوں نہ ٹھکرائو ۔ میں 2004ء اِچ پہلے وی ہندوستان تھی آیا ہم پر اُوں ویلے صرف امبرسر‘پٹیالہ تے چندی گڑھ دا ویزا ہا ۔ اساں چندی گڑھ نہ ݙیکھ سڳیوسے کیوں جو ساݙا ٹِکاݨاں  پٹیالہ دے پرو وائس چانسلر دی کوٹھی اِچ بݨ ڳیا ہا ۔ واپسی ویلے امبر آئیوسے  گوردوارہ ’’گولڈن ٹمپل‘‘ اساں ݙٹھا تے چار ݙینہ ہندوستان وچ لا کے وَل آئیوسے۔ایں واری ساݙا ہندوستان وچ ݙہ ݙینہ رہݨ دا پروگرام ہا ۔ اَتے ترے وݙے شہراں دی وزٹ کرݨی ہئی تہوں سنگت دا جوش تے جذبہ ݙاڈھا زور دا ہا۔

حوالہ

کتاب: دِلّی ڈھائی کوہ۔ مصنف شوکت مغل، چھپیندڑ: جھوک پبلشرز ‘ ملتان