دلشاد بلوچ

اصل ناں       دلشاد احمد

قلمی ناں       دلشاؔد بلوچ

جٖمنْ           1972ء

تعلیم          میٹرک

پیشہ           زمیندارہ

جاہ پتہ       وستی بلوچاں ، نورپور نورنگا ،بہاولپور

غزل

ہے خطا بٖس ایہ میڈٖی جو کر کھڑا ہاں پیار میں

ہے اوہو قاتل میڈٖا سمجھا ہا جیکوں یار میں

دلربا ایجھیں ادا دے نال میں توں دل منگیا

چیر سینہ دل ڈٖتم نہ کر سگٖیم انکار میں

بھل گٖیا ہاں رل گٖیا ہاںکر کھڑاں نقصان خود

اوندے کوڑے وعدیاں دا کر کرائیں اعتبار میں

غوطے کھاندا میں ودا ہاں غم دے گھمنْ گھیر وچ

ڈٖا ترنْ دا آندا نئیں اُروار ہاں نہ پار میں

غم فکر کھادی ویندن میں بھل گٖیاں ہر عیش کوں

چن جڈٖاں دا رُخ وٹائے ہوں ڈٖینہ دا ہاں بیمار میں

جگٖ دیوچ دلشادؔ میکوں لبھدا نئیں غمخوار کوئی

ہُنْ تاں اصلوں زندگی توں تھی گٖیاں بے زار میں