دریائے کرم

دریائے کرم (پشتو: د کرمې سيند) افغانستان دے صوبے غزنی دے پہاڑیں نال ملحق 50 میل دور کوہ سفید دے لمیں حصے توں نکل کے علاقہ کرم ایجنسی وچ قوم بنگش دی زمینیں کوں سیراب کریندا ہویا ٹل بلند خیل شاخ، بنگش خیل دے پاسوں گزردا ہے۔ ضلع بنوں دی پچادھی حد نال ملحق پوسٹ کرم دے مکان پوادھ توں بنوں وچ داخل تھیندا ہے۔ ایہ دریا تقریباً ہر موسم وچ وہندا ہے۔ آلے ݙیوالے دے پہاڑی برساتی نالے ایندےاچ وہندن۔ ماضی وچ برسات دے ݙیہاڑے وچ ݙوہیں کناریں تک وہندا ہئی، پر کرم گڑھی سکیم دے بعد دریا سنبھلݨ لڳا۔ ہݨ ماضی دی طرح کہرام برپا نئی کریندا۔ ماضی وچ ٻہوں ساریاں وستیاںتے رقبے دریا برد تھی ڳئے ہن۔ دریائے کرم توں قبیلہ منگل نے پہلی واری نہر کچکوٹ کݙھائی ہئی۔ ہک ݙوجھی ویال پٹونہ ہے جیہڑی بعد وچ لمیں توں موجود اولاد شیتک دے عہد وچ کݙھائی ڳئی ہے، جتھوں علاقہ ممد خیل وزیر سیراب تھیندا ہے۔ مجیر نکلسن نے ویال لنڈیڈوک ٹیلی رام تحصیلدار دی نگرانی وچ 1855ء وچ کھٹوائی۔ اینکوں ٹیلی رام نہر وی آہدن۔ اتھوں لنڈیڈوک دی چھی ہزار کنال اراضی قابل کاشت بݨ ڳئی ہے۔ ایندے علاوہ ویال آمندی، ویال ہنجل، ویال منڈان، ویال فاطمہ خیل، خون بہا، ویال چشنہ تے ویال شاہ ایں دریائے کرم توں کݙھائیاں ڳئیاں ہن۔ ویال شاہ جیہڑی شاہجہان دے پتر دارا توں منسوب کیتی ویندی ہے۔ بہتر نظام آبپاشی دے باعث بنوں ہک زرخیر جاہ ہے۔ دور توں ݙٹھا ونڄے تاں بنوں جنگل نظر آندے۔