درویش دا حال

کمبھاریں دی وستی وچ ہک درویش راہندا ہا، ناں تاں اُوندا غلام مصطفی ہا تے اونکوں وݙا کمبھار سݙیندے ہن۔ اوندے اصلی ناں دا کہیں کوں پتہ نہ ہا ۔چاچے بھورل کمبھار دا پُتر ہا ،جوان امان ہا ،اکھیں توں متھاج ہا ،بے لباس راہندا ہا اونکوں اللہ سئیں ایجھا ہاں دا سوجھلا ݙتاہا جو اوندی فقیری دے قصے سارے لوک سݨیندن۔ ظہور احمد دھریجہ اوں فقیر دا حال وی لکھیے تے وستی دا حال حویلہ وی لکھیے ، خاص ڳالھ اے ہے جو ظہور احمد دھریجہ اپݨی بچپن دیاں یاداں سچائی نال بیان کیتن تے کہیں ڳالھ دا اولا نی رکھیا تے اُنہاں اے وی لکھیے جو اساں کمبھاریں دی وستی روٹیاں گھنݨ ویندے ہاسے ۔ ظہور احمد دھریجہ اپݨی کتاب اچ لکھدن:

’’اساں جئیں ویلے کمبھاریں دی وستی ونڄوں ہا ،بھانویں اساں مونہوں کجھ نہ اَلائوں ہا تا فقیر وݙا کمبھار ناں گھن تے اَلویندا ہا ،نال ونڄݨ آلے چھوکرے رِیس کریندے ہن جو فقیر اساݙا ناں تاں نی گھِندا ،تیݙا ناں اُونکوں کیویں یاد اے، متھاج ہا پر سُݨدا سمجھدا سب کجھ ہا ،اَلیندا وی سُوہݨا ہا ،اُو جماندرواللہ لوک ہا ،اوندے سارے بھرا خادم حسین، غلام مرتضیٰ تے عاشق حسین میݙے ابے کول پڑھیے ہن،فقیر تاں اُمی ہا پر میݙے ابے کوں اُستاد سݙیندا ہا تے جݙاں میں روٹیاں گھنݨ نہ ونڄاں ہا تاں چھوکرے ݙسیندن جو وݙا سئیں پچُھدا ہا جو اے میݙے اُستاد دا پُتر کائنی آیا ،فقیر سئیں دیاں ڈھیرساریاں ڳالھیں ہن جیڑھے لکھݨ پڑھݨ نال وی تعلق رکھدن،پر اُوندے واسطے الڳ ہک کتاب دی ضرورت ہے ،مسئلہ چھو منتری آلا وی کائنی پر اللہ سئیں جیرھے لوکیں کوں اپݨا بݨا گھندے ،اونکوں ݙاتاں وی ݙیندے ،اوڑک کئی تاں وجہ ہئی جو اساں سیالے دی مُد کوں پالے توں ݙکدے ودے ہوندے ہاسے تے وݙا سئیں الف ننگا ٻیٹھا ہوندا ہا ،جے کر کہیں کمل یا سوّڑ اُتے سٹی اے تاں پرے بھنوا مریندا  ہا ۔میں وݙے سئیں دے بھرا غلام مرتضیٰ جیرھے ریلوے وِچوں گارڈ ریٹارتھین کوں وݙے سئیں دے ڄمݨ تے مرݨ دی تاریخ پچُھی تاں اُنہاں ݙسیا جو پاکستان بنݨ کنوں پہلے پیدا تھئے ہن تے 1973ء دے سیلاب دے بعد فوت تھین‘‘

حوالہ

ظہور احمد دھریجہ دی سرائیکی ادبی خدمات دا جائزہ (مقالہ نگار: شائستہ ظہور،بہاء الدین زکریا یونیورسٹی ملتان)  نگران مقالہ: ڈاکٹر محمد ممتاز خان کلیانی