دربار محل

دربار محل

دربار محل پاکستان دے شہر بہاولپور وچ واقع ہک محل ہے۔ ایہ عمارت سابق ریاست بہاولپور دیاں درباری تقریبات تے سرکاری دفاتر کیتے تعمیر کیتی ڳئی ہئی۔ ایہ محل 75 ایکڑ (30 ہیکٹر) دے باغ وچ واقع ہے۔ 1966ء توں ایں محل کمپلیکس کوں مسلح افواج کوں لیز تے ݙتا ڳیا ہے۔ ایہ حالیہ دور وچ پاکستان آرمی دی 35 انفنٹری ڈویژن دے ہیڈکوارٹر دے طور تے استعمال تھیندا ہے تے عوام کیتے کھلا کائنی۔

تاریخ

ایہ محل بہاول خان پنجم نے تعمیر کروایا ہئی۔ ایہ 1905ء وچ مکمل تھیا تے بہاول گڑھ پیلس کمپلیکس وچ کئی ٻئے محلات دے نزدیک واقع ہے، جنہاں وچ نشاط محل، فرخ محل تے گلزار محل شامل ہن۔ شروع وچ ایں کوں مبارک محل دا ناں ݙتا ڳیا ہئی۔ ایہ نہ صرف ہک شاہی رہائش گاہ ہئی بھل ریاست بہاولپور دیاں درباری تقریبات تے انتظامی سرگرمیاں کیتے وی استعمال تھیندا ہئی۔

اُساری

ایہ سکھ-عربی بݨتر دے انداز وچ تعمیر کیتا ڳیا ہے، جیڑھا مقامی، سکھ، تے عربی اثرات کوں ملاوݨ والا ہے۔

محل دے ٻاہرلے حصے وچ پیچیدہ کھدائی، ڄالی دا کم، تے اسٹکو دا کم شامل ہے۔ عمارت دے ہر پاسوں ہک وݙا داخلی دروازہ تے جھروکے والیان بالکونیاں ہن۔ ایہ محل زیادہ تر سرخ سلھاں نال تعمیر کیتا ڳیا ہے تے سرخ تے سفید رنگ دا ہک منفرد امتزاج پیش کریندا ہے، جیندے وچ سفید رنگ چھتاں تے کھڑکیاں کوں نمایاں کریندا ہے جݙاں جو سرخ رنگ ٻاہرلیاں دیواراں کوں نمایاں کریندا ہے۔ ایہ عمارت اپݨے چار جڑے ہوئے گنبداں، وسیع اندرونی حصے تے 80 توں زیادہ کھڑکیاں نال ممتاز ہے، جیڑھے چوݙویں صدی دی قدیم اسلامی روایات کوں ظاہر کریندے ہن۔ عمارت دی تریجھی منزل مغلیہ انداز وچ چھتری والی چھت ہے، جیندے ہر کونے تے ہک مخصوص برج ہے جیندے تے سکھ انداز دے گنبد ہن۔ محل دے اندرونی حصے وچ انویہویں صدی دیاں ودھایاں پینٹنگ، روایتی زیورات، ڳاہݨے، تے نواب خاندان دیاں تلواراں سجاوٹ کیتے رکھیاں ڳیاں ہن۔ شاندار فرنیچر، قیمتی قالین، تے مخمل دے پردے ایندے شاہی ماحول کوں ودھیک چمک ݙیندے ہن، جیندے نال سرامک ٹائلز نال بݨے محراب تے وݙے لیمپ محل دی شان و شوکت کوں ودھیک نمایاں کریندے ہن۔