دامودرداس تے ہیر

سرائیکی قصہ ہیر رانجھا دا تعلق وی جھنگ نال ہے ، سرائیکی شاعر دامودرداس دا تعلق جھنگ نال ہے ۔ دامودر داس مغل حکمران اکبر بادشاہ دے زمانے وچ ہیر لکھی تے ݙاڈھی مشہور تھئی ، اے قصہ اَڄ بیان کریندے جو جھنگ تے سارے علاقے دی زبان سرائیکی اے ، انہاں دے بعد اورنگزیب بادشاہ دے زمانے وچ احمد قوی ناں دے شاعر 1682عیسوی وچ ہیر دا قصہ لکھیا۔ اٹھارہ سال بعد سرائیکی شاعر چراغ اعوان 1710ء عیسوی اِچ ہیر داقصہ لکھیا ، اے سرائیکی قصے سارے جگ جہان وچ مشہور تھی چکیے ہَن تے انہاں توں متاثر تھی تے 36سال بعد 1746ء اِچ پنجابی زبان دے شاعر وارث شاہ ہیر لکھی ۔ ہیر لکھݨ والے ٻئے شاعراں وچ ملک احمد بخش غافل 1870ء دے وچ ہیر لکھی ۔ اے شہر قصبہ گورمانی تحصیل کوٹ ادو ضلع مظفرگڑھ دے رہݨ والے ہَن ۔ ایندے بعد ہیر لکھݨ والے شاعریں دی ٻہوں لمبی تندیر اے ۔ انہاں وچ ڈھیر سارے شاعر ایہو جے ہن جنہاں دا کلام نی چھپ سڳیا ۔ اسلامیہ یونیورسٹی دے پروفیسر ممتاز بلوچ سرائیکی قصیاں دی تاریخ تے تحقیق کریندے پِن۔

حوالہ

کتاب: میݙی دھرتی، میݙے لوک ، مصنف: ظہور احمد دھریجہ ، ناشر: جھوک پبلشرز ، ملتان 2018ء