دارا سنگھ

دارا سنگھ
معلومات شخصیت
ڄمݨ	19 نومبر 1928ء   پنجاب
وفات	12 جولا‎ئی 2012ء (84 سال)  ممبئی
وجہ وفات	عَجزِ قلب
شہریت	بھارت (26 جنوری 1950–) برطانوی ہند (–14 اگست 1947) ڈومنین بھارت (15 اگست 1947–26 جنوری 1950)
جماعت	بھارتیہ جنتا پارٹی
ٻال	وندو دارا سنگھ
عملی زندگی
کم	سیاست دان ،  فلم ہدایت کار ،  فلم ساز ،  پیشہ ور پہلوان ،  فلم اداکار ،  ٹیلی ویژن اداکار
پیشہ ورانہ زبان	ملیالم
کھیݙ	پیشہ ورانہ کشتی
اعزازات
ڈبلیو دبلیو ای ہال آف فیم
	IMDB پر صفحات

دارا سنگھ بھارتی پہلوان اتے اداکار ہن۔ اوہ بھارتی پنجاب وچ 19 نومبر، 1928ء کوں ہک سکھ ٹٻر وچ پیدا تھئے۔ انہاں دے پیو دا ناں سورت سنگھ رندھاوا اتے ماء دا ناں بلونت کور ہئی۔ لمے چوݙے دارا سنگھ کوں ٻالپݨ توں ہی پہلوانی دا شوق ہئی۔ انہاں 1966ء وچ رستم پنجاب اتے 1978ء وچ رستم ہند دا خطاب حاصل کیتا۔

اوہ 1947ء وچ سنگاپور چلے ڳئے ہن اتے کوالالمپور وچ ترلوک سنگھ کوں ہرا کے ملیشیا وچ چیمپئن بݨ ڳئے۔ انہاں پیشہ ور پہلوان دے طور تے مشرق بعید دے تقریباً سارے مُلکاں دا دورہ کیتا۔ دارا سنگھ نے لوتھیز اتے ہسٹانلسا زیباسکو جئیں بین الاقوامی پہلواناں نال مقابلہ کیتا۔ انہاں 500 توں ودھ کشتیاں لڑیاں اتے کݙاہیں وی ہار دا منہ نی ݙٹھا۔ 1959ء وچ کینیڈا دے چیمپئن جارج نگوڈنوکر کوں ہرا کے دولت مشترکہ چیمپئن ٹرافی جیتی۔ انہاں 1983ء وچ کشتی توں ریٹائرمنٹ ڳھن ڳھدی اتے 1989ء وچ اپݨی خودنوشت سوانح "میری آتم کتھا" پنجابی وچ شائع کیتی۔ 1996ء وچ انہاں کوں نیوز لینڈ دے ہال آف فیم وچ شامل کیتا ڳیا۔ انہاں دے آخری ٹورنامنٹ دا افتتاح اوں ویلے دے وزیر اعظم راجیو گاندھی نے کیتا ہئی جیندے وچ انہاں ریٹائرمنٹ دا اعلان کر ݙتا۔ انہاں کوں جیت دا تحفہ اوں ویلے دے صدر گیانی ذیل سنگھ نے ݙتا ہئی۔

اداکاری

1952ء وچ انہاں اداکاری دا آغاز فلم "سنگدل" توں کیتا۔ مجموعی طور تے انہاں 121 ہندی اتے 21 پنجابی فلماں وچ کم کیتا۔ اوہ ہک تیلگو اتے ہک ملیالم فلم وچ مہمان اداکار دے طور تے وی آئے ہن۔ انہاں اداکارہ ممتاز دے نال ٻہوں کامیاب فلمی جوڑی بݨائی اتے 16 فلماں وچ ہک ٻئے دے نال کم کیتا جیندے وچوں 10 فلماں ٻہوں کامیاب تھیاں۔ 1980ء وچ اوہ ٹیلی ویژن دی طرف آئے اتے رامائن ڈرامے وچ ہنومان دا کردار ادا کیتا جیہڑا ٻہوں مشہور تھیا۔ انہاں دی آخری قابلِ ذکر ہندی فلم "جب وی میٹ" ہئی جیندے وچ انہاں کرینہ کپور دےݙاݙا دا کردار ادا کیتا ہئی۔

فلم سٹوڈیو

دارا سنگھ موہالی (چندی گڑھ) وچ مشہور دارا سنگھ اسٹوڈیو دے مالک وی ہن جینکوں 1978ء وچ قائم کیتا ڳیا ہئی۔

سیاست

دارا سنگھ بھارتی سیاست وچ وی فعال کردار ادا کیتا اتے دارا سنگھ سنہ 2003ء وچ بھارتیہ جنتا پارٹی دی طرفوں راجیہ سبھا دے رکن نامزد کیتے ڳئے۔

وفات

دارا سنگھ کوں جولائی دے ݙوجھے ہفتے دل دا دورہ پیا اتے انہاں کوں ممبئی دے کوکیلابین ہسپتال وچ داخل کرایا ڳیا، لیکن انہاں دی طبیعت خراب تھیندی ڳئی۔ طبیعت ٻہوں خراب تھیوݨ دے بعد انہاں دے گھر آلے انہاں کوں موت توں ݙو ݙینہہ پہلے واپس گھر ڳھن ڳئے ہن جتھاں انہاں جمعرات دی سویل تقریباً ساݙھے ست وجے آخری ساہ ڳھدا۔ دارا سنگھ دے پُتر اتے اداکار وندو سنگھ نے آکھیا جو بیماری نال انہاں دے دماغ تے بُرا اثر تھیا ہئی۔ ’ایں کیتے اساں چاہندے ہئیں جو اوہ اپݨے آخری لمحات ٹٻر آلیاں دے نال گزارن۔ 12 جولائی، 2012ء کوں دل دا دورہ پووݨ نال ممبئی، بھارت وچ انہاں دا انتقال تھی ڳیا۔

ساتھی فنکار انوپم کھیردا خراج عقیدت

اداکار انوپم کھیر نے دارا سنگھ دے انتقال تے افسوس دا اظہار کریندے ہوئے آکھیا ہئی جو دارا سنگھ اوہ ہستی ہن جیہڑے ہک مثال بݨ ڳئے ہن، لوک آکھݨ دے طور تے آہدے ہن ’’تساں کیا اپݨے آپ کوں دارا سنگھ سمجھدے پیئو‘‘۔ انہاں دا مزید آکھݨ ہئی جو دارا سنگھ ٻہوں ہی سادہ مزاج شخص ہن اتے ’انہاں دی ہنسی ٻالاں جئیں ہئی۔ تھی سڳدے جو اڄ دی نسل دارا سنگھ دے بارے وچ نہ ڄاݨدی ہووے لیکن ساݙے ٻالپݨ اتے جوانی دیاں یاداں دا اوہ اہم حصہ ہن۔