دائی پھاپھل حفظاݨی

دائی پھاپھل حفظاݨی کوں وی اے شرف حاصل ہے کہ انھاں حضرت خواجہ فرید سئیں کوں بچپن وچ کھݙایا تے کھیر پلایا۔ آپ اوں ویلے دے مشہور طبیب حکیم محمد کبیر خان شاکر دے گھر 1800ء دے نیڑے تیڑے پیدا تھئی۔ شعر گوئی دا آپ کوں بچپن توں شوق ہئی۔ حفظاݨی آپ تخلص کریندے ہن۔ آپ حضرت خواجہ خدا بخش دی مرید ہن۔ آپ 1870ء وچ وفات پاتی۔ دائی پھاپھل حفظاݨی دیاں لوریاں خاصی شہرت رکھدن۔ سرائیکی لوری دا نمونہ۔ اے لوری اَڄ وی شہر فرید تے کوٹ مٹھݨ وچ عرس تے موقعہ تے گائی ویندی اے۔

الا اللہ دی جوت جڳانواں

لولی ݙیواں لال کوں

محبوب مٹھل دے ٻال کوں

ننڈھے قطب کمال کوں

فریدݨ سئیں لڄپال کوں

حفظاݨی دی من ڳال کوں

جند پیا جیویں حق دا عاشق

عرض اے ذوالجلال کوں

الا اللہ دی جوت جڳانواں

لولی ݙیواں جوان کوں

عشق دے ایں پہلوان کوں

محبت دے سلطان کوں

مرشد جمل جہان کوں

حفظاݨی پیر مغان کوں

ماݨیں جند جوانی جانی

عرض ہے رب رحمان کوں

الا اللہ دی جوت جگانواں

لولی ݙیواں خورشید کوں

فخر جہاں دی عید کوں

عالم حافظ سعید کوں

سوہݨے پیر فرید کوں

حفظانی دی اُمید کوں

پینگھا لوݙاں لولی ݙیواں

لاڄ ہے رب حمید کوں

حوالہ

کتاب: سرائیکی شاعری دا اِرتقاء، مصنف: ڈاکٹر نصراللہ خان ناصر، چھاپہ خانہ : جھوک پبلشرز ملتان