خوش خیر محمد ہسیباݨی

آپ رئیس غلام حیدر ہسیباݨی دے پتر ہن۔1809مطابق 1224کوں ڳوٹھ گل محمد ہسیباݨی نواب شاہ وچ پیدا تھئے۔ انہاندے وڈکے ساہیوالوں آدم شاہ کلہوڑے دے زمانے سندھ اِچ آن وسے۔ نکے لا قرآن شریف اتے فارسی دیاں کتاباں پڑھیونے ۔ روایتاں موجب خوش خیر محمد ہسیباݨی نوشہرہ دے نقشبندی بزرگ پیر عبدالحئی دے مرید تھئے۔ انھاں اپݨیاں کئی کافیاں اِچ اپݨے مرشد نال عقیدت دا اظہار وی کیتے۔ وفات دے بعد آپ کوں لگرن دی گوٹھ اِچ دفنا یا ڳیا پر دریا دے رُخ بدلݨ سببوں آپ دی میت کوں کید رائی ضلع خیر پور منتقل کر ݙتا ڳیا ۔ اے علاقہ اَڄ وی ہناں دے ناں نال مشہور ہے ۔ اے اتھاں ہر سال ذی الحجہ دی 18-17اتے 19کوں میلہ لڳدے۔(81)

کافی

تیݙی حق دے نال حیاتی ہے

ایہو روح جسم وچ ذاتی ہے

جے کے جیندے تھی مرجیسن پئے

وچ ہر ݙو جہاں ڳلیسن پئے

پیالہ آپ حیات دا پیسن ہے

جنھاں جھات اندر وچ پاتی ہے

الانسان سر اظہار ݙیکھیں

لا نینہ نسنگ نروار ݙیکھیں

کر’’نحن‘‘ وا وچار ݙیکھیں

اے گھر میݙے دا بھاتی ہے

تیکوں غفلت نت نائم ہے

دریا حقیقی دائم ہے

سدا بحر بقا دا قائم ہے

اے چھل آتی جاتی ہے

خوش خیر محمد نبی خبر کنہاں

متاں ٻول سݨاوے پھیر ٻنہاں

سر صدق کریں سو وار تہاں

جنہاں اسم جسم توں جاتی ہے

حوالہ

کتاب: سرائیکی شاعری دا اِرتقاء، مصنف: ڈاکٹر نصراللہ خان ناصر، چھاپہ خانہ : جھوک پبلشرز ملتان