خوشتر ججوی

آپ داپورا ناں محمد نواز تخلص خوشتر تے جا ٹکاݨہ ججہ عباسیاں تحصیل خان پور ہے۔ آپ موالی طبیعت دے بندے ہن۔ کئی سالاں تئیں گھروں نکل تے اینویں پھردے ٹُردے رہ ڳے۔ آپ کوں لطف علی نال ݙوی عقیدت ہئی۔ ہر وقت انھاں دا کلام ڳاندے رہندے ہن۔ ول خود انھاں یوسف زلیخا دا قصہ لکھیا۔ اے قصہ طویل تے فنی خوبیاں نال سجیا ہویا قصہ ہے۔ خوشتر ججوی چھیکڑی بزرگ شاعر ہن جنھاں اے قصہ لکھیا۔ اے قصہ اُنھاں 1372ھ وچ مکمل کیتا۔ خوشتر کافی طویل عمر پاتی ہئی۔ اسی سال توں زیادہ عمر وچ آپ دا انتقال 1970ء وچ تھیا۔ ’’یوسف زلیخا‘‘ سرائیکی علاقے وچ ٻہوں مقبول اے۔ ایں توں علاوہ انھاں کافیاں تے ݙوہڑے وی آکھیے۔ کلام دی ونکی:

کافی

رُس ڳیوں سانول یار پھیرا مُول نہ پایو

دل وچ درد ہزار پھیرا مول نہ پایو

واٹاں تیݙیاں ٻیٹھی بھالاں

راتیں ݙینہاں پانواں فالاں

کر ڳیوں ظلم اندھار ‘ پھیرا مول نہ پایو

کلہڑا چھڈ ڳیوں نہ مکلایو

مونجھ وطن دی دل تے آیو

کیتو مفت خوار ‘ پھیرا مول نہ پایو

کر ڳیوں سیج سوہانری خالی

ہوت بروچل پنل عالی

سسڑدی دا سردار ‘ پھیرا مول نہ پایو

باندی بردی تیݙے دَر دی

جنگل جھر وچ رُلدی مردی

روواں زار نزار‘ پھیرا مول نہ پایو

حوالہ

کتاب: سرائیکی شاعری دا اِرتقاء، مصنف: ڈاکٹر نصراللہ خان ناصر، چھاپہ خانہ : جھوک پبلشرز ملتان