خورجین، ٹوکری ، کوندھا وغیرہ

خورجین

اْون دا بݨیا ہویا تھیلا ہوندے جیڑھا سفر دے دوران گھوڑے دی کَنڈ تے رکھیا ویندے۔ ایندے وچ نقدی تے کھاوݨ پیوݨ دا سامان رکھ کے بند کرݙتا ویندے۔

توبرہ

اْون دا بݨیا ہویا ہک خاص قسم دا تھیلا ہوندے۔ جیندے اچ داݨے سَٹ کےگھوڑے دے منہ تے ٻدھ ݙیندن تے گھوڑا حفاظت نال داݨے کھاندے۔

ٹوکری

اے پیش دی بݨی ہوئی ہوندی اے تے ضرورت دا سامان رکھݨ تے چاوݨ دے کم آندی اے۔

کوندھا

ایکوں مشکیزہ وی آکھیا ویندے بکری دی کھل ایں مہارت نال لہائی ویندی اے جو ایندے وچ معمولی جیہاں ٹک تے مُورہ نیں ہوندا۔ تھل تے دمان دے لوک پاݨی بھرݨ تے سفر وچ نال رکھݨ کیتے استعمال کریندن۔ ایندے وچ پاݨی خراب نئیں تھیندا بلکہ ٹھڈاتے تازہ رہ ویندے۔

سنداری

اے کوندھے دی کار بکری دی کھل دی بݨائی ویندی اے۔ بیٹ دے لوک سنداری وچ ہوا بھر کے دریا وچ تردن تے اینکو پار کریندن۔

حوالہ

سرائیکی افسانے تے ناول وچ دیہاتی منظر نامہ، تحقیقی و تنقیدی مطالعہ (مقالہ نگار: صبیحہ منظور )  نگران مقالہ ڈاکٹر مقبول حسن گیلانی