خواجہ محکم الدین سیرانی

حضرت خواجہ محکم الدین سیرانی کھرل قوم نال تعلق رکھیندے ہن۔ آپ دی تاریخ پیدائش 1137ھ ہے آپ پیدائشی ولی ہن۔ آپ اپݨے سوتر حضرت خواجہ عبدالخالقؒ کنوں تعلیم و تربیت تے روحانی فیض حاصل کیتا ۔ بعد وچ آپ دہلی ونڄ تے حضرت خواجہ فخر الدین جہاں دے درس وچ باقاعدہ تعلیم حاصل کیتی۔ حضرت خواجہ نور محمد مہارویؒ آپ دے دوڑی ہن۔ پیشہ آپ دا کھیتی باڑی ہئی سر تے پگڑی یا قادری ٹوپی پیندے ہن ۔ آپ کوں سیر و سیاحت دا ٻہوں شوق ہئی۔ وستی وستی ‘ شہر شہر ونڄ تے دین دی تبلیغ تے خلق خدا دی راہنمائی فرمیندے ہن۔ گجرات کاٹھیا واڑ وچ آپ نے بے شمار لوکاں کوں مسلمان کیتا۔ آپ نے کئی حج پاپیادہ کیتے۔ آپ ہک رات توں زیادہ ہک جاہ تے نہ ٹِکدے ہن ۔ ہمیشہ سفر وچ رہن ہا آپ دا وصال وسورا جی کاٹھیا واڑ وچ زیر خورانی نال تھیا۔ آپ بہاول پور دے مشہور تاریخی قصبے خانقاہ شریف دے وچ دفن ہن۔ آپ دا مزار اَڄ بے شمارلوکاں دی عقیدتاں دا مرکز ہے ۔ آپ دا وصال 5ربیع الثانی 1197ء وچ تھیا۔(53)

حضرت خواجہ محکم الدین سیرانی ہک ولی کامل تے صوفی منش بزرگ ہن۔ آپ صوفیانہ رنگ دی زندگی بسر کریندے ہن تے ݙوجھیاں کوں وی فقر درویشی دی تعلیم ݙیندے ہن۔ حضرت محکم الدین سیرانی دی ہک سی حرفی مشہور ہے۔ ہک بند ملاحظہ فرمائو:

ب بسم اللہ کہہ کر وڑساں پھرساں ڈھونݙیندی بیلا

واٹاں گھاٹاں پچھدی وتاں ݙیکھاں وقت نہ ویلا

توں ماہی دی سِک ہے میکوں کڈاں کریسیں میلا

بئسما یامُرکُم بہ  ایمانکم جو  ہو  رہا  جی  حیلا

حوالہ

کتاب: سرائیکی شاعری دا اِرتقاء، مصنف: ڈاکٹر نصراللہ خان ناصر، چھاپہ خانہ : جھوک پبلشرز ملتان