خواجہ غلام فرید شاہ
خواجہ غلام فرید شاہ (1885-1924) میانوالی دے بلند پایہ اولیاء کرام وچوں ہک ہن۔ او پیر سیال دے جانشین خواجہ محمد الدین سیالوی دے خلیفہ ہن۔ انہاں نو سال تائیں خواجہ آباد شریف وچ اپݨے والد ماجد دے جانشین دی حیثیت نال خدمات سرانجام ݙتیاں۔
انہاں دی پیدائش 1302ھ بمطابق 1885ء وچ خواجہ محمد پیر بخش رحمۃ اللہ علیہ دے گھر دندی میانوالی وچ تھئی۔ انہاں دا تعلق سادات کاظمی نال ہئی تے انہاں دا سلسلہ نسب امام موسی کاظم تائیں پُڄدے۔ انہاں نے ابتدائی دینی تعلیم حاصل کیتی تے انہاں دی تعلیم فقہ تے صرف و نحو دی ابتدائی کتاباں تائیں محدود ہئی۔ انہاں دا مزاج صوفیانہ تے قلندرانہ ہوݨ دی وجہ توں او مزید تعلیم حاصل نہ کر سڳے۔
انہاں نے سیال شریف دے سجادہ نشین خواجہ محمد الدین سیالوی دے ہتھ تے بیعت کیتی تے انہاں دے زیر سایہ سلوک دیاں منزلاں طے کیتیاں۔ خواجہ محمد الدین سیالوی نے انہاں کوں 1326ھ بمطابق 1908ء وچ سند خلافت عطا کیتی۔ خواجہ غلام فرید شاہ کوں اپݨے شیخ نال ٻہوں محبت ہئی تے او اکثر سیال شریف وچ رہ کے اپݨے شیخ دی خدمت کریندے ہن۔
انہاں دے والد ماجد خواجہ محمد پیر بخش 22 صفر 1334ھ بمطابق 1915ء کوں فوت تھی ڳئے۔ والد دے وصال دے بعد او وݙے پُتر ہوݨ دی وجہ توں والد دے جانشین مقرر تھئے۔ انہاں دے والد کوں دندی میانوالی وچ دفن کیتا ڳیا ہئی۔ تدفین دے ہک سال بعد دریائے سندھ وچ ٻہوں وݙا طوفان آیا جیندے نال ٻہوں سارے شہر تباہ تھی ڳئے۔ خواجہ غلام فرید شاہ دے ٹٻر تے رشتے داراں کوں وی شہر چھوڑݨا پیا لیکن رات کوں خواجہ محمد پیر بخش نے اپݨے پُتر خواجہ غلام نصیر الدین شاہ کوں خواب وچ آکھیا کہ ہݨ شہر چھوڑݨ دا ارادہ ترک کر ݙیو۔ میں کوشش کریندا پیاں کہ اللہ تعالیٰ ساݙے شہر کوں بچا ڳھنے۔ ایں سلسلے وچ میں حضرت خضر علیہ اسلام نال گزارش کیتی ہے۔ ول انہاں نے اپݨے مزار کوں وی اتھوں منتقل کرݨ دا حکم ݙتا۔ علی الصبح کم شروع تھی ڳیا تے انہاں دے جسد مبارک کوں ہک میل پوادھ دی طرف خواجہ آباد شریف وچ دفن کیتا ڳیا۔ ظہر دے بعد دریا نے ایں طرف اینویں تباہی مچائی کہ خواجہ محمد پیر بخش دا آبائی شہر صفحہ ہستی توں مٹ ڳیا۔
خواجہ غلام فرید شاہ ٻہوں سادہ طبیعت دے مالک ہن تے ٻہوں سوہݨے تے طاقتور ہن۔ او سلوک و صفا دے صاحب ہن تے اپݨے والد ماجد دی پیروی کریندے ہن۔ سجادہ نشین ہوݨ دے بعد انہاں دا فیض ہر خاص و عام کیتے ہک جیہاں ہئی۔ او ناؤ سال دے مختصر عرصے کیتے سجادہ نشین رہے لیکن ایں مختصر حیاتی وچ وی ولایت دے آفتاب بݨ کے چمکدے رہے۔ انہاں دا وصال بروز ہفتہ 11 جمادی الثانی 1342ھ بمطابق 19 جنوری 1924ء کوں تھیا تے انہاں کوں خواجہ آباد شریف وچ اپݨے والد دے پہلو وچ دفن کیتا ڳیا۔ انہاں دا عرس ہر سال 11 جمادی الثانی کوں منایا ویندے۔ اللہ پاک نے انہاں کوں ترائے پُتر عطا کیتے ہن جنہاں دے ناں غلام نظام الدین شاہ، غلام کمال الدین شاہ تے سید محمد حسن شاہ ہن۔[١] [٢]