خواجہ حسن افغان

خواجہ سئیں ذات دے سیّد ہَن۔ اَتے سئیں شیخ الاسلام بہاء الدین زکریاؒ دے مُرید ہَن۔

حیاتی دا احوال

خواجہ سئیں ذات دے صحیح النّسب سیّد ہَن۔ کیوں جو افغاناں وِچ پَلّے وَدّھے، تہوں افغان مشہور تھی ڳئے۔ حسن ناں دے ݙُو درویش سئیں شیخ الاسلام بہاء الدین زکریاؒ دے مرید ہَن۔ ہِک سبّی دے بلوچ میر حسن بلوچ ہَن اَتے ݙُوجھا ایہ سیّد جُؤان ہَئی۔ میر حسن بلوچ نے شیخ الاسلام سئیں کوں ارداس کِیتی جو مدّت کنوں ایہ آس رکھین٘دا ہاں جو سئیں حضورِ حق دے ویلے اِیں خاکسار کوں نعمتِ حق کنوں بہرہ ور فرمیسِن۔ پَر جہڑیلے اُوہ ویلا آیا اَتے سئیں شیخ الاسلام نے حسن کوں سݙّیا تاں بلوچ میر حسن پِیا خراٹے گِھن٘دا ریہا اَتے حسن افغان حاضرِ خدمت تھی ڳِیا۔ اَتے پیرِ کامل دی بھال نال اُون٘دے اُتّے بھوئیں تے اَسمان دے سارے طبقات روشن تھی ڳئے۔
خواجہ حسن افغان نے اَݨ ڳِݨَت ریاضتاں کِیتیاں۔ ولایت دے مرتبے اُتے فائز تھئے اَتے اُوہ درجہ مِلّیا جو سئیں شیخ الاسلام فرمین٘دے ہون٘دے ہَن جو:-
"ڄیکر قیامت دے ݙِین٘ہ میݙے کنوں سوال تِھیا جو تُساں دُنیا کنوں کیا تُحفہ گِھن آئے ہِیوے تاں میں عرض کریساں جو خواجہ حسنؒ دا صدق اَتے صحیح اعتقاد گِھن آیا ہاں۔"
جہڑیلے فقر تے ولایت دی تکمیل تھی ڳئی تاں شیخ الاسلام نے حُکم ݙِتّا جو افغاناں وِچ ون٘ڄ تے تبلیغ کرو۔ تَہُوں ٻہوں مُد سئیں نے غرغشیاں وِچ اصلاحِ احوال دا کَم کِیتا۔ اَخِیرلی عمر وِچ ملتان وَل آئے اَتے مرشد دے پیراں وِچ تدفین تھئی۔

ٻِیا ݙیکھو

• شیخ الاسلام بہاء الدین زکریاؒ ملتانی۔
• میر حسن بلوچـ

حوالے

۔