خواجگی امکنگی

خواجگی امکنگی
(اردو : محمد مقتدیٰ امکنگی)
معلومات شخصیت
ڄمݨ دی تریخ	سنہ 1512ء
مرݨ دی تریخ	سنہ 1600ء (87–88 سال)

خواجہ محمد مقتدیٰ امکنگی (1512/13-1600) سلسلہ نقشبندیہ دے وݙے بزرگاں وچوں ہک ہن۔ انہاں دا اصل ناں محمد مقتدیٰ ہئی تے او خواجگی تے خواجہ امکنگی حضرت دے ناں توں وی مشہور ہن۔ انہاں دی پیدائش 918ھ وچ بخارا دے نیڑے امکنہ نامی وستی وچ تھئی، ایں نسبت نال امکنگی سݙویندے ہن۔ انہاں دے والد قطب عالم خواجہ درویش محمد نے انہاں دی تعلیم و تربیت تے ٻہوں توجہ ݙتی۔ خواجہ محمد مقتدیٰ نے ظاہری تے باطنی علوم اپݨے والد توں حاصل کیتے تے سلوک دی تکمیل تے خلافت دا خرقہ پاتا۔ والد دے وصال دے بعد مسند نشین تھئے تے دین دی ٻہوں تبلیغ کیتی۔ او شریعت و سنت تے طریقہ عالیہ نقشبندیہ دے اصولاں دے سخت پابند ہن۔ ودھاپے دے باوجود مہماناں دی خدمت اپݨے ہتھوں کریندے ہن۔ علما، فضلا، امرا تے فقرا انہاں توں فیض حاصل کرݨ آندے ہن۔ والی توران عبد اللہ خان اکثر انہاں دی خدمت وچ حاضر تھیندے ہن۔ خواجہ محمد مقتدیٰ کرامت کوں کوئی اہمیت نہ ݙیندے ہن تے فرمیندے ہن کہ اللہ والیاں دے کول خالص اللہ کیتے آوݨا چاہیدا ہے تاکہ انہاں دے باطن توں حصہ ملے۔ انہاں دی طبیعت وچ ٻہوں انکساری ہئی۔ او خواجہ بہاؤالدین نقشبند دے اصل طریقہ نقشبندیہ دے سخت پابند ہن تے ذکر بالجہر تے ٻیاں نویاں ڳالھیں توں پرہیز کریندے ہن۔ انہاں دی کوئی خانقاہ نہ ہئی تے انہاں دی مجلس وچ رقص و سماع دی گنجائش نہ ہئی۔ انہاں دا وصال تقریباً نوے سال دی عمر وچ 22 شعبان 1008ھ کوں تھیا تے انہاں دا مزار شریف سمرقند توں 84 کلومیٹر دے فاصلے تے شہر کتاب دے نیڑے امکنہ وچ زیارت گاہ خاص و عام ہے۔ برصغیر پاک و ہند خواجہ امکنگی دے شکر گزار ہن کہ انہاں اپݨے خلیفہ محمد باقی باللہ کوں اتھاں بھیڄ تے طریقہ عالیہ نقشبندیہ توں اتھوں دے لوکاں کوں فیضیاب کیتا۔