خبر دے پچھّوں اِشٹوری

الیکشن تھیندن؟ الاہے کائنی تھیندے؟ کئی لوک ایہو جِہے ہِن جنہیں کوں اَڄݨ وی ایہو وِپرا کھادی وَدّے ایجھے بندیں دیاں ڳالھیں سُݨ تے وݙی چَس اَمدی اے ۔ ایجھیاں ایجھیاں ڳالھیں کڈھ مریندن جو سَواد آ ویندے ‘ کلھ … ہوٹل اِچ اِیہا بحث تھیندی پئی ہئی ‘ ہک آکھݨ لڳا او سئیں ! ٻی ڳالھ سُݨی ہیوے؟ امریکہ کھڑکی پٹا ݙتی اے ’’مارکے‘‘ کوں ۔ ہُݨ وَیڑے اِن ‘ ݙیکھ گھناہے ۔ ویھ(20)تریخ تئیں ’’اسمبلیاں‘‘ بحال تھی ویسن ۔ صدر اسحاق خان دی چُھٹی تھی ویسے ۔ سینٹ دے چیئرمین وسیم سجاد کوں صدر بݨا ݙیسن۔ پر ہِک ڳالھ اے ۔ شئیت وزیر اعظم  ایہو رہ ونڄے ‘ اوں ڳالھ مُکائی تاں اوندے نال ٻیٹھے ہوئے ݙوجھے بندے اوں کنوں پُچھیا توں ایہ ݙس تیکوں ایہے سبھے ڳالھیں کَیں ݙسایاں ہِن ؟ ۔ ٻیا وَت کون ݙسیسے میکوں؟ سبھو  کجھ اخباریں اِچ تاں چھپدا پے ۔ ݙیہاڑی ‘ تُساں اخبار دھیان نال پڑھو تاں تُسیکوں پتہ لڳے … اخبار تاں اساں دھیان نال پڑھدے رہندوں ‘ پر جیرھیاں خبراں تُساں ’’مونہہ زبانی‘‘ سُݨویندے او اساں تاں اخباریں اِچ کائنی پڑھیاں ۔ ووئے بابا ! تسیکوں کیا پتہ اخبار کیویں پڑھیندی اے؟ ۔ ہک تاں تُساں پڑھدے وے قتل ‘ قتلام ‘ چوری‘ ڈکیتی ‘ اغوا تے ’’ٹھا ‘ پھا‘‘ آلیاں خبراں یا وَل پڑھدے وے ’’ضرورت رشتہ‘‘ دے اشتہار اَتے فلم ایکٹریں ‘ فلم ایکسٹریسیں دے بارے ’’خبراں‘‘  سیاست تے سیاستدانیں دے بارے جیرھیاں خبراں چھپدین ‘ اُنہیں وِچ ہَر’’خبر‘‘  دے پِچھوں ہک ’’اِشٹوری ہوندی اے ۔ ہِک خبر چھپی ہئی ’’جی ایم سید کوں باعزت رَہا کر ݙتا ڳے ۔ ایندے پِچھوں ہک اِشٹوری ہئی ۔ ہک خبر مولوی عبدالقادر آزادؔ دی طرفوں  چھپی ہئی جو پی پی کوں ووٹ ݙیوݨ کُفر اے ایندے پِچھوں وی ہک اِشٹوری ہئی۔’’جھوک‘‘ اِچ خبر چھپی اے ۔ ایں واری آبادکار سیٹھ اسلم دی بجائے چودھری عطاء محمد کوں ووٹ ݙیسن ۔ ایندے پِچھوں وی ہک اِشٹوری اے ‘ ٻئی خبر چھپی اے جو آئی جے آئی اَپݨے امیدواریں کوں کِروڑیں دا فنڈ ݙتے ۔ ایں خبر دے پِچھوں وی ہک اِشٹوری اے۔

سُݨݨ آلا اَک نَک تھیا ٻیٹھا ہا ۔ ڳالھ کرݨ آلے ساہ گھدا تاں اوں ہَتھ ٻدھ تے آکھیا ’’ہوسے یار! ہر ’’خبر‘‘ دے ’’چھپݨ‘‘ اَتے نہ چھپَݨ دے پِچھوں ہک اِشٹوری‘ پر تیݙی ایہ ڳالھ مَیں نی مَنیندا جو اسمبلیاں بحال تھی ویسن ‘ میݙی سمجھ اِچ کائنی اَمدی تیݙی ایہ ڳالھ ۔ نِیں سمجھ اَمدی تاں ۔ نہ آوے ۔ نہ من تاں نہ من ۔ باقی ݙینھ چوکھے رَہ ڳین؟ نئی کنوں پُچھیا ہانیں چَھتے چوکھے وݙے اِن؟ اوں وَلدی ݙتی ہئی جو ہوونی اَڳوں آ پمدن۔ 20؍تریخ تاں آوݨ ݙے ‘آپے مَنیسیں میݙیاں ڳالھیں ۔

حوالہ

ٻٹ کڑاک، مصنف: انیس دین پوری۔ ناشر: جھوک پبلشرز ملتان