خان پور ریلوے ٹیشݨ

خان پور ریلوے ٹیشݨ، خان پور شہر وچ واقع ہے جیہڑا کہ صوبہ پنجاب دا حصہ ہے۔ اے پاکستان ریلوے دا ہک اہم جنکشن ہے جتھوں ݙو اہم ریلوے لائناں ملدیاں ہن: کراچی–پشاور ریلوے لائن تے خان پور–چاچڑاں ریلوے لائن۔ ایں واسطے اینکوں جنکشن آکھیا ویندے۔

خان پور ٹیشݨ دا کوڈ KPR ہے۔ اتھو روزانہ کئی ٹریناں گزردیاں ہن جیہڑیاں ملک دے مختلف شہریں کوں ویندیاں ہن جنہیں وچ کراچی، لاہور، فیصل آباد، راولپنڈی، ملتان تے پشاور شامل ہن۔ خان پور دی تاریخی اہمیت وی ہے تے ایندا ریلوے ٹیشݨ وی ایں تاریخ دا حصہ ہے۔ انگریزیں دے دور وچ بݨیے ہوئیے آثار اڄ وی اتھائیں موجود ہن۔ خان پور–چاچڑاں ریلوے لائن ہک چھوٹی لائن ہے جیہڑی خان پور کوں چاچڑاں نال ملیندی ہے۔