خادم رزمی

1932ء تا 2006ء

خادم رزمیؔ مرحوم ضلع خانیوال دے مہاندرے شاعر ہن۔آپ دی ہک کتاب ’’اساں آپے اُݙݨ ہارے‘‘2006ء وچ چھپ چکی ہے۔جیندا ناں انہاں حضرت سلطان باہو دے ہک مصرعے’’تاڑی مار اُݙا نہ باہو اساں آپے اُݙݨ ہارے ہو‘‘اچوں مستعار گھدے ۔شاید آپ دیاں بٖیاں کتاباں وی ہوسن لیکن میݙے علم اچ کائنی۔خادم رزمی دی شاعری بنیادی طور تے معاشرے دی اصلاح تے بھلائی واسطے ہے۔اوہ دیہاتی تے شہری لوکاں دی زندگی سنوارݨ چاہندن تے اَہدن۔

؎کھوہاں تے وی جھوٹے فیشن

شہراں دی وچکار دے آڳئے

ٻہوں گھاٹا ہے انڄ چپ رہݨاں

ویلے ہُݨ نروار دے آڳئے

غزل

چھپّر اُݙ ڳئے کھولے ڈھہہ ڳئے

وسوں دی تھاں ٹِبٖے رہ ڳئے

ٹوئے ریتا رہ ڳیا اوتھے

پہلاں جتھے دریا وہیہ ڳئے

کاہدے اوہ مسافر جیڑھے

چھاں جتھ ملّی اوتھے بٖہہ ڳئے

’’دل دا محرم کوئی نئیں ملدا ‘‘

پیر فریدݨ سچّی کہہ ڳئے

کی دسئے انھی مجبوری

نہ سہندی وی آخر سہہ گئے