خادمؔ ملک ملتانی

1916ء

حضرت خادمؔ ملک ملتانی مرحوم ملتان دے مہاندرے شاعر تے علم عروض دے ماہر استاد ہن۔آپ دی شاعری وچ روایت دے ڈٖاڈھے سوہنْے نمونے ملدن۔نمونہ کلام حاضر ہے۔

غزل

کوئی ایجھاں دانشور ہُنْ منصف بنْ کے آوے

اساں ڈٖوہاں وچ نفرت والی اے دیوار ڈھہاوے

اجٖ کل میل محبت والی کئی وی گٖالھ نی رہ گٖئی

جتھاں ڈٖیکھو ہر ہک جاہ تے ماس کوں ماس پیا کھاوے

اے وی کئی انصاف ہے یارو ، اے وی کئی نروارے

زر والے تاں نندراں کُٹِّن بے زر پیا کرلاوے

ہک تاں شیش محل وچ وسے بٖیا وت پیٹ دی خاطر

دھرتی دا پیا سینہ چیرے دُھپ تے ہل وہاوے

جیکوں ساری دنیا کولوں دل نے چنگٖاں سمجھیا!

اوہو سجٖنْ ویری بنْ کے دل کوں پیا زخماوے

رُٹھا یار مناونْ لوکو ، ڈٖاڈھا اوکھا کم اے

کئی تاں سر قربان کرے ، کئی نچ کے یار مناوے

ہُنْ تاں خادمؔ محرم دل دا پیار دا ویری تھی گٖئے

ایجھاں سجٖنْ کوئے نی جیڑھا اوکوں ونجٖ سمجھاوے

؎اوہ ہن بے شک تیر تے تیر چلاونْ والے

اساں وی ہیں سینے تے پھٹ کھاونْ والے

ایہ تاں پک ہے توں کئی دل دا کھوٹا کوئنی

تیکوں تاں بٖس چیندن چاونْ لاونْ والے

؎ہک دلڑی درد ہزار سجٖنْ

تَیں بٖاجھ نہ کئی غمخوار سجٖنْ

بھُل معاف چا کر میں خادمؔ دی

میں خادم توں سردار سجٖنْ

٭٭٭