حیدرؔ گردیزی

1926ء تا1991ء

حیدر ؔگردیزی مرحوم دا تعلق ملتان نال ہا ۔آپ زیادہ تر آزاد نظم لکھدے ہن لیکن پابند شاعری وی انہاں دی گرفت اچ ہئی۔آپ ہر دلعزیز ، ادب نواز تے اپنْی ذات اچ ہک انجمن دی حیثیت رکھدے ہن۔جاپانی صنف ہائیکو کوں سرائیکی اچ متعارف کراونْ آلے آپ پہلے شاعر ہن۔ آپ دے غزلیہ کلام دا نمونہ ڈٖیکھو!

غزل

چھِنْکا ہے چاننْی دا ہر رات تیڈٖے گھر تے

ہک روشنی دا دریا وہندا پیا ہے در تے

منزل تے پجٖ کے شالا نفرت دا منہ نہ ڈٖیکھاں

ٹریا ہے گھن کے میکوں دل پیار دے سفر تے

میں اوندی چپ کوں اوندا کورا جواب سمجھاں

کیوں شرم سار تھیواں ول ول سوال کرتے

ہر پھیری سوچیا ہے ایں پھیری پُٖج تاں پونواں

سوہنْے دے در توں آساں خشیاں دی جھولی بھر تے

شاید ہوا دے ہتھ نے حیدرؔ سنیہا لکھئے

تحریر ہے نمایاں ہر پتے دے جگر تے

؎معشوق رب ہن ربا! دہائی ہے

عاشق دے کیتے کیا جھک نوائی ہے

درختاں دے پتے تاڑیاں مریندن

تَیں بٖاجھ میں تے اے رُت وی اَئی ہے