حمید جتوئی

عبد الحمید جتوئی پاکستان دے سندھ نال تعلق رکھݨ آلے بزرگ سیاست دان تے سابق وزیر اعلیٰ سندھ لیاقت جتوئی دے پیو ہن۔

حالات زندگی

عبد الحمید جتوئی دادو دے گاؤں بیٹو جتوئی وچ ڄمیے۔ ترائے دفعہ ممبر قومی اسمبلی منتخب تھیوݨ آلے اپݨے مخصوص انداز تے فکر دی وجہ توں گذشتہ چار ݙہاکے تک سندھ دی سیاست تے چھائے رہے۔انہاں نے مغربی پاکستان اسمبلی وچ ون یونٹ دے خلاف ووٹ ݙتا ہئی۔ تے شیخ مجیب دے چھ نکات دی حمایت کیتی ہئی۔ اوہ جی ایم سید تے میر غوث بخش بزنجو دے فکری ساتھی سمجھیے ویندے ہن۔حمید جتوئی نے ہمیشہ حزب مخالف دا ساتھ ݙتا تے حکومت تے تنقید کوں شیوہ بݨائے رکھیا۔ انہاں نے خود کݙاہیں سرکاری عہدہ قبول کائنی کیتا تاہم انہاں دی سیاست دے طفیل انہاں دے پتر لیاقت جتوئی ترائے دفعہ وزیر تے ہک و اری وزیر اعلیٰ سندھ رہے۔

جتوئی دا شمار سندھ دے وݙے قوم پرست رہنماواں وچ تھیندے۔ سٹھ دے آخری عشرے وچ جݙاں ذوالفقار علی بھٹو نے پیپلز پارٹی بݨائی تاں اوہ ایں وچ شامل تھئے۔ لیکن اڳوں چل کے انہاں دے تے بھٹو دے درمیان اختلاف پیدا تھی ڳیا تے اوہ پہلے سندھی رہنما ہن جنہاں نے قومی اسمبلی وچ ذوالفقار علی بھٹو دی مخالفت کیتی۔ جیندے دی پاداش وچ انہاں کوں گرفتار وی کیتا ڳیا لیکن عدالت نے انہاں دی نظربندی کوں کالعدم قرار ݙے ݙتا۔ایں واقعے دے بعد اوہ بھٹو تے پیپلز پارٹی دی سیاست دے مخالف تھی ڳئے تے آخر ویلے تک ایں موقف تے قائم رہے۔ انہاں نے مسلم لیگ دی جونیجو حکومت تے بعد وچ نواز شریف حکومت دی حمایت کیتی۔ ضیاء دور وچ جݙاں پیپلز پارٹی زیر عتاب ہئی تاں سندھ وچ سیاسی خلا کوں پر کرݨ کیتے مختلف سیاست داناں، خاص طور تے قوم پرستاں کوں کٹھا کرݨ دی کوشش کیتی ڳئی۔ انہاں نے ایں ویلے وچ وجود وچ آون آلے سندھ قومی اتحاد دی تشکیل وچ اہم کردار ادا کیتا۔انوی سو پنڄاسی وچ غیر جماعتی انتخابات دے بعد جݙاں ملک وچ مارشل لا ہٹاوݨ کیتے اسمبلی دے اندر تحریک چلی تاں جتوئی نے حاجی سیف اللہ دے نال مل کے اہم کردار ادا کیتا۔ حمید جتوئی آخر تک کالاباغ ڈیم دے مخالف رہے۔

وفات

حمید جتوئی گردے دی تکلیف دی وجہ توں جنوری 2004ء وچ انتقال کر ڳئے۔