حقنواز باقی لغاری

تحریر اورنگزیب اورنگ بغلانی

حقنواز باقی لغاری سن۔1988-1-4 اچ گل محمد خان بغلانی دے ہاں چک حملڑی چوٹی بالا اچ پیدا تھیونڑ آلہ نوجوان گریجویٹ فرید ساجد لغاری دا شاگرد ہے غزل ڈوہڑہ ،قیصدہ نظم قعطہ جیسی اصناف دیوچ لکھدے رہے ویندن مختلف اخبارات اتے رسائل اچ کلام شائع تھی چکے 2004 توں باقاعدہ شاعری دا سلسلہ شروع کیتے قلم تئیں خوب گرفت ہے پہاڑ واسی اے شاعر اپنڑیں ہتھ اچ نئی مالا گھن تے صحرا ادب اچ کوچ کریندا پئے اپنے کلام اچ تکرارِ لفظی کرتے وسعت معنی اچ اضافہ کریندے اتے اپنڑیں جزبات دا اظہار جاندار طریقے نال کریندے

جیتایاں بازیاں ہردے ویندوں

تیڈی مونجھ توں مردے ویندوں

باقی بچ گیوں باقی اساں

تیکوں ڈھول وسردے ویندوں

یاد ہک اینجھا سہارہ ہے جیندے ذریعے انسان مستقبل دا سفر جاری رکھ سگدے اتے ماضی وی نال نال رہ ویندے وسیبی ثقافت دا کئی وی پروگرام انسان کوں ماضی دی طرف گھن ویندے حضرت سخی سرور دا سالانہ عرس یا میلہ اپنے اندر پھر پور رومانیت رکھدے جیندی یاد شاعر کوں شیشے دی طرح نظردی ہے مارچ دی چاندنی رات دا ہک تصور اپنڑیں ذہن اچ گھن آؤ

چئیتر بنسنتی چاندڑیاں راتیں اوکھیاں تھی تے لنگھدیاں پیاں ہن

میلے سخی سرور سئیں دے آوے پھیرا پاوے

ترٹی شئے کوں جوڑن انسان دی فطری عمل اچ ہک عمل ہے مگر ہک کہیں تخلیق کار دا مصنوعی انداز اچ گالھ کرن وڈی وسعت معنی حامل ہوندی ہے اساڈی زندگی غربت دی چکی دی طرح چلدی پئی ہے پٹھے کپڑیں کوں سیونڑ تے پاونڑ انسان دی زندگی دا حصہ تھی گئے کیا اساں ایں چکر دے اسیر رہ ویسوں یا نویں تسخیر ہی شامل ہے

ساڈی سہیلی عمر بھر اجرک کتھی کوں سیونڑے

محبوب ہک انیجھی چیز ہے جیرھی بھلاونڑ دے قابل کائنی بلکہ محبوب اتے محب ہک ڈوجھے نال جیڑیے یوے ہودن گو کہ اے خیالی منظر ہوندے شاعر دی زندگی گہرائی نال وابستہ ہودندی ہے حالات واقعات کجھ وی ہوون

تونڑیں جو مونجھ تیڈی دا وسارا انت نئیں تھیندا

اکھیں نیلم نگینے تئیں تیڈی تصویر باقی ہے

اسلام تفرقہ دا خاتمہ اتے اتحاد دا درس ڈیندے مگر ملاں فرقہ پرست ہوندے نتیجہ دہشت گردی فساد ،قتلوغارت بارود اتے تباہی دا سبب بنڑدے کیا ہی اچھا ہے جو اسلام دے سب شیدائی مسالک اتحاد اور امن دے پرچارک ہوندے فقہیہ وقت مجدددوراں یا مجتہد عصر کوئی کرشمہ ڈکھیندے

ول شر پسندی دا انوکھا کھیڈ کھیڈن واسطے مسلک پرستی دے فقیہہ کیوں کئی طریقے تیار ہن

کوئی خبر نئیں شہر وچ باقی ولا کیا تھیونڑے والناس دے کلمے ولا دہشت کنوں ڈوچار ہن

مایوسی دی دبیر چادر مفلوک الحال معاشرہ کیا مثبت سوچ رکھدے او اپنڑیں مستقبل دے بارے سوچٹرن توں ڈردے کہیں ایجنٹ انہاں کوں سالیں تئیں گم ناں کر ڈیوے او وقت دی بے رحم آندھی دےسامنڑیں بند بدھڑن دی بجائے حالات دی رو اچ وہن پسند کریندے احساس کمتری دا پٹہ گردن پایئندے۔بلکہ ظاہری طور تئیں آزاد دھرتی اچ ایں معاشرے دے افراد قیدیں آلی زندگی گزارن تے مجبور ہودن اتے قیدی وی چپ چاپ

اساں ایویں قیدی رہنڑے

توں تاں حسن نگر دا شاہ ہیں

توں تاں اصلوں بے پرواہ ہیں

تیڈی مرضی

تیڈے سبھ فرمان اکھیں تے نہ الویسوں

ساڈی چپ اے اساں قیدی

ہن سوال اے ہے جو ایں مخصوص قیدی دی رہائی کیویں ممکن ہے ضمیر دی عدالت بے لوث وکیل کتھاں ہے اے بھکا ننگا قیدی کڈنڑ رہا تھیسی یا کہیں خان ملک شیخ سردار دی ٹیکسٹائل مل اچ ٹی بی دے جراثیمیں دی خوراک بنٹرسی شاعر دا ایہ انقلابی پیغام یا شعری احتجاج،جگیر داریں سرمایہ درایں دے تابڑ توڑ حملیں دے اگوں کیا کر سگدے اے وقت ڈسیسی ،دور حاضر اچ انیجھے لوک خول الود بنگلے ڈیکھ تے دیہاتیوں میں ویرانے دی رونق ہن

سروں منہ زور واچھڑ ہے فکر ہے آشیانے دی

تیڈیاں ماڑیاں محل بنگلے اساں رونق ویرانے دی

اجاں باقی کھڑی باقی غذا تیڈے نشانے دی

حق نواز باقی لغاری دامان ادبی سرائیکی سنگ دے پریس سیکرٹری اتے سہ ماہی ادبی جریدہ دامان دے نائب نگراں وی ہن اتے ہک چنگے رائٹر وی ہن سرائیکی اچ افسانہ نگاری کالم نگاری سماجی ادبی ثقافتی محرومیوں تئیں کئی کالم لکھ چکین جیرھے مختلف اخبارات دی زینت بنڑ چکین او بیک وقت کالم نگار دے طور تئیں وی معاشرے اچ اپنڑاں مقام رکھدن دعا ہے جو دامان واسی اے شاعر ایویں لکھدا ہسدا تے وسدا راہے آمین ثمہ آمین