حضرت پیر ملوک شاہ رحمۃ اللہ علیہ
تاریخ وچ ہے کہ ریاست دے نواب نے بڑی کوشش کر گھدی مگر موجودہ بہاولپور شہر آباد کرݨ وچ ناکام تھیا. کیونکہ اتھوں دا کھاری پاݨی تے سخت گرم آب و ہوا لوگاں کوں راس نہ آندی ہئی تے کوئی اتھاں آباد تھیوݨ تے تیار نہ ہئی. ملتان شہر دے بالکل سیدھ وچ ہووݨ دی وجہ نال اے مخصوص جغرافیائی مقام کشش تے اہمیت دا باعث ہئی مگر پاݨی تے آب و ہوا دا مسئلہ رکاوٹ ہئی. نواب کہیں ݙوجھی جگہ شہر نہ وساوݨاں چاہندا ہئی لہٰذا او پیر ملوک شاہ ہوراں دی خدمت وچ حاضر تھیا تے اپݨی عرض بیان کیتس.
آپؒ نے ہک پاݨی دا بھرا ہویا گھڑا چاتا تے اوندا پاݨی موجودہ بہاولپور شہر دے علاقے وچ موجود پاݨی دے تمام کھوہ تے کھوئیاں وچ شامل کر ݙتا. اتھوں گزرݨ والے قافلیاں دے تے اردگرد دے دیہاتاں دے جیہڑے لوگاں نے وی انہاں کھوئیاں دا پاݨی پیتا تاں اتھوں دے تھی کے رہ ڳئے تے آپ دی ایں کرامت نال ٻہوں جلد نواب دی آرزو دے مطابق مطلوبہ مقام تے بہاولپور شہر آباد تھی ڳیا تے ملتان دی گزرگاہ تے واقع ہووݨ دی وجہ نال ایندی اہمیت وی قائم تھی ڳئی. پیر ملوک شاہ دا مزار بہاولپور چھاؤݨی تے نور محل دے نزدیک شہر دے سب توں وݙے قبرستان وچ اے جیہڑا آپ دی وجہ توں ملوک شاہ قبرستان دے ناں نال مشہور اے.