حضرت مجروح شاہ

م:1308ھ؍1891ء

حضرت سید جہان شاہ مجروح شہر اللہ آباد تحصیل لیاقت پور دے رہݨ والے صوفی شاعر ہن۔ عالم با عمل تے ولی اللہ گزرین۔ آپ حضرت خواجہ اللہ بخش تونسوی دے مرید ہن۔حضرت خواجہ فرید سئیں نال عقیدت تے سنگت رکھدے ہن۔ آپس وچ اکثر میل ملاقات رہندی ہئی۔ مجروح سئیں دے کلام وچ تصوف تے معرفت دا ہک نویکلا رنگ پایا ویندے۔

ہر طرف دل کھسدا

تیݙا ناز ماہیا

بت خانے آرام کتووے

آزرموہ گدھووے

وت علیل خلیل دلاندا

آن کفیل کتووے

’’لَا یُحب اِلا فُلیس‘‘ پڑھ کے

مسئلہ وحدت ݙسدا ‘ بندہ نواز ماہیا

آپ ٻہوں وݙے عاشقِ رسولؐ ہن۔ آپ دے ݙوہڑے تے سی حرفی عشق رسولؐ دے بیان وچ بے نظیر ہن۔

م ماہ تاں شاہ جمال دا اے

میݙے یار دے نال مجال نسی

اوہے خدنسی اوہے خال نسی

اوہے ونگرے ونگرے وال نسی

اوہے ابرو قوس مثال نسی

اوہے نرگس جادو خال نسی

یار تاں بے دی مثال ہویا

پیر مجروح دے حال تے بھال نسی

حوالہ

کتاب: سرائیکی شاعری دا اِرتقاء، مصنف: ڈاکٹر نصراللہ خان ناصر، چھاپہ خانہ : جھوک پبلشرز ملتان