حضرت قبول فقیر

چانڈیہ بلوچ قبیلے دے اے بزرگ حضرت بہاء الدین ذکریا ملتانی ؒ دے سینگے تے سوتر حضرت موسیٰ نواب دے خلیفہ خاص ہن۔(57)۔ آپ دی یادگار معراج نامہ سرائیکی شاعری دا ہک نادر نمونہ ہے۔ چھیویں صدی ہجری دی سرائیکی شاعری دی اے سوکھڑی ادبی لحاظ نال وݙی اہمیت دی حامل ہے۔ حضرت قبول فقیر ہک عالم دین تے عربی فارسی زبان دے ماہر ہن۔ ایں معراج نامے وچ انھاں جا جا تے عربی ‘ فارسی الفاظ دا استعمال کیتے۔ اے معراج نامہ 61اشعار تے مبنی ہے ۔

حوراں لعل موتی جواہر جڑیاں

سبھے راہ نبی دا جو بھالن کھڑیاں

عنبر مشک کستور چمکار دا

کھلے در بہشتی اوہ گلزار دا

تجلیٰ خدائی دا چمکار ہا

کہ برسر نبی نور انوار ہا

سبھے لنگھ لنگ ونڄ چڑھیاں عرش تے

جُتی لاہ پیروں لنگھیا فرش تے

سنیا غیبی آوازئہ ذاتِ پاک

جُتی پیری کر چا لڳی خاکِ پاک

اَمنا کیتا قول خیر البشر

مشرف تھیا عرش سیتی فخر

سھبو راز در راز نکتہ ٻیاں

وہم آدمی دا کیا کرسی عیاں

سنبھالیں قٻولا عقل ‘ ہوش کُن

نہیں جاہ تیری توں خاموش کُن

حوالہ

کتاب: سرائیکی شاعری دا اِرتقاء، مصنف: ڈاکٹر نصراللہ خان ناصر، چھاپہ خانہ : جھوک پبلشرز ملتان