حضرت شاہ ولایت ملتانی

ݙھویں صدی ہجری دے ہک ملتانی بزرگ حضرت شاہ ولایت دینی مدارس وچ پڑھاوݨ کیتے قانون صرف کوں منظوم تحریر فرمایا تے ایندا ناں ’’قوانین منظومہ ہندیہ‘‘ رکھیا۔ اے وی ہک درسی کتاب ہے۔ شاہ ولایت ملتانی توں پہلے عربی دے قوانین کہیں عالمِ دین ہندی یعنی سرائیکی زبان وچ قلمبند کیتے ہن۔ مگر شاہ ولایت آہدن کہ اوندی زبان یا طرزِ بیان ٻہوں مشکل ہئی۔ کہیں کوں سمجھ نہ آندا۔ ہِیں کیتے انھاں کوں قوانین منظوم کرݨ دی ضرورت پیش آئی۔

قانون صرف دے کہیں شخص نے ’’ہندی‘‘ وچ بݨائے

پر یاد کریندیاں بندیاں نوں اوہ بھی مشکل آئے  (ص:279)

اے رسالہ چووی(24)صفیاں دا ہے جیکوں کتب خانہ خضر منزل ملتان شائع کرایا ہئی ۔ رسالہ دے آخری شعر اے ہن۔

قانون صرف دے مُکّے یارو فضل کیتا رب باری

نال فضل دے اللہ بخشے جو کوئی سامع قاری

شاہ ولایت عاصی بھارا کر اُمید دعائیں

شاید برکت کیں صاحب دے بخش کرے رب سائیں(ص:313)

حوالہ

کتاب: سرائیکی شاعری دا اِرتقاء، مصنف: ڈاکٹر نصراللہ خان ناصر، چھاپہ خانہ : جھوک پبلشرز ملتان