حضرت خواجہ غلام فرید رح
حضرت خواجہ غلام فرید (رح) دا شمار برِ صغیر دے اکابر اولیاء کرام وچ تھیندے۔آپ ٻہوں وݙے صوفے ہَن۔ آپ نے سرائیکی کوں اعلیٰ درجے تے فائز کیتا۔ سرائیکی زبان دی ترقی وچ آپ دا کردار ناقابلِ بیاں ہے۔
ولادت
[لکھو | ماخذ وچ تبدیلی کرو]عظیم سرائیکی شاعر حضرت خواجہ غلام فرید (رح) 26 ذیقعدہ 1261 ھ بمطابق 1845ء کوں چانپور دے مشہور قصبے چاچڑاں شریف وچ ڄمے ہَن۔ آپ دے والد حضرت خواجہ خدا بخش نے آپ دا ناں خورشید عالم رکھیا،بعد وچ بابا فرید پاکپتن آلی سرکار تے بابا فرید الدین گنج شکر (رح) دی نسبت کنوں غلام فرید الدین ناں تجویز کیتا تے آپ نے ایں ناں توں شہرت پائی۔
پرورش
[لکھو | ماخذ وچ تبدیلی کرو]چاچڑاں شریف وچ آپ دی پرورش مکمل اسلامی ماحول وچ تھیی،خدمت کرݨ آلیاں بیبیاں حافظِ قرآن تے صوم صلواۃ دیاں پابند ہَن۔ اُنہاں دی جبھ تے حسبی ربی جل اللہ۔۔ دا ورد جاری راہندا ہا۔
آپ دی والدہ کوں عبادت تے سخاوت وچ اچا مقام حاصل ہئی آپ دی والدہ نے آپ دی تربیت تے خاص توجہ ݙتی۔آپ دے والد نے وی آپ دی چنگی پرورش کیتے آپݨی ذال دی مدد کیتی۔
بچپن وچ یتیمی
[لکھو | ماخذ وچ تبدیلی کرو]حضرت خواجہ غلام فرید (رح) دی عمر چار سال ہئی کہ انہاں دی والدہ دا انتقال تھی ڳیا تے جیہڑے ویلھے او اٹھ سال دے ہن کہ انہاں دے والد دا انتقال تھی ڳیا۔ اگھاں آپ دی تربیت آپ دے وݙے بھتا فخر جہان نے کیتی۔
در یتیم شاہی محل وچ
[لکھو | ماخذ وچ تبدیلی کرو]ماں پیو دی وفات دے بعد نواب آف بھاولپور نے حضرت خواجہ فخر جہان سائیں کنوں ارداس کیتی جو حضرت خواجہ غلام فرید کوں اساݙے کنیں بھیج ݙیوو تاں جو محل وچ قابل استاداں دی نگرانی وچ آپ دی تربیت تھی سڳے۔ چنانچہ آپ دے بھرا نے آپݨے مرید دی ارداس کوں پورا کریندے وے آپ کوں اتھائیں بھیج ݙتا تے آپ نے اتھاں چار سال گزارے۔
اٹھ سال دی عمر وچ حفظ قرآن
[لکھو | ماخذ وچ تبدیلی کرو]اے وی ہک تاریخی واقعہ ہے جو آپ نے اٹھ سال دی عمر وچ نہ صرف قرآن مجید حفظ کر گھدا بلکہ ٻہوں سارے دینی علوم وی سکھ گھدے۔