حضرت خواجہ غلام فریددے ݙوہڑے

حضرت خواجہ غلام فرید سئیں دے ناں نال بے شمار ݙوہڑے وی منسوب ہن۔ مگر حقیقت اے ہے کہ حضرت خواجہ فرید سئیں صرف کافی صنف دی طرف توجہ ݙتی ہے۔ کوئی ݙوہڑہ کینی لکھیا۔ علامہ طالوت دی تحقیق دے مطابق اے ݙوہڑے خواجہ فرید دے کینی بلکہ انھاں دے مرید عقیدت مند سید ولایت شاہ دے ہن ۔ ڈاکٹر مہر عبدالحق وی ایں خیال دی تائید کریندن کہ خواجہ سئیں کافی دے بادشاہ ہن۔ انھاں ہک ݙوہڑہ وی کینی لکھیا۔(47)اساکوں خود وی حضرت خواجہ سئیں دے قلمی دیوان ݙیکھݨ دا موقعہ ملیے۔ کہیں وچ ݙوہڑے درج کینی اینویں خواجہ صاحب دی وفات دے نیڑے تیڑے چھپݨ والا پہلا مجموعہ کلام اساݙے سامݨے ہے۔ اوندے وچ وی کوئی ݙوہڑہ شامل کینی۔ ایں لحاظ نال اے طے ہے کہ اے ݙوہڑے انھاں دے مریداں عقیدت دی وجہ توں انھاں دے نال منسوب کیتن۔

نمونہ کلام:

میݙا عشق وی توں میݙا یار وی توں

میݙا دین وی توں ایمان وی توں

میݙا سانول مِٹھڑا شام سلوݨاں

من موہن جانان وی توں

میݙا جسم وی توں میݙا روح وی توں

میݙا قلب وی توں جند جان وی توں

میݙا ذکر وی توں میݙا فکر وی توں

میݙا ذوق وی توں وجدان وی توں

………

میݙا زہد عبادت طاعت تقویٰ

علم وی توں عرفان وی توں

میݙے فرض فریضے حج زکوٰتاں

صوم صلوٰۃ اذان وی توں

میݙا کعبہ قبلہ مسجد منبر

مصحف تے قرآن وی توں)

روہی نال حضرت فرید سئیں کوں عشق ہئی۔ روہی دا ہک ہک منظر انھاں ایں انداز نال بیان کیتے کہ سارے عکس اڳوں آ ویندن۔

کافی

روہی وٹھڑی ٹوبھا تار وے

آ مل توں سینگا یار وے

تھئے تھلڑے باغ بہار وے

چودھار گل گلزار وے

کتھے چنڑکیں دے چھݨکار وے

کتھے مٹیاں دے گھٻکار وے

ݙینہ رات مینگھ ملہار وے

وچ پکھیاں دے چوہنکار وے

پئے ٹھہندے ہار سنگھار وے

سرخی تے کجلا دھار وے

سینگیاں وسن گھر ٻار وے

لا ڳل سمھِن دلدار وے

ہک میں رُلی اَوّازار وے

ݙکھ سُول نال وپار وے

توں بن فرید خوار وے

رت ہنجڑوں رووݨ کار وے

حوالہ

کتاب: سرائیکی شاعری دا اِرتقاء، مصنف: ڈاکٹر نصراللہ خان ناصر، چھاپہ خانہ : جھوک پبلشرز ملتان