حضرت حافظ محمد جمال
حضرت حافظ محمد جمال مظہر الٰہی1160ھ ملتان اِچ پیدا تھئے۔ آپ دے ابا سئیں دا ناں حافظ محمد یوسف ہئی تے آپ دے ݙاݙا سئیں دا ناں حافظ عبدالرشید ہئی۔ آپ قوم دے اعواݨ ہن۔ آپ دے خاندانی حالات دا زیادہ پتہ نیں لڳدا۔ حضرت منشی غلام حسن گانمݨ شہید اپݨی کتاب انوار جمالیہ وچ لکھدن حضرت حافظ جمال دے قبلہ گاہ دا ذریعہ معاش تجارت ہا۔(59)
حضرت حافظ جمال جہاد دی عملی تربیت ݙیندے ہن۔ آپ سکھاں دے خلاف خود وی جہاد وچ حصہ گھدا۔ آپ حضرت خواجہ نور محمدمہارویؒ دے مرید ہن تے آپ اپݨے پیر و مرشد نال بے پناہ عشق کریندے ہن۔ آپ ہک صوفی بزرگ وی ہن تے وݙے پائے دے عالمِ دین وی ہن۔ آپ ہر وقت عبادت و ریاضت تے تبلیغ دین تے درس و تدریس وچ مشغول راہندے ہن۔ آپ دا5جمادی الثانی 1226ھ کوں تقریباً 66سال دی عمر وچ تھیا۔(60)آپ دا مزار مبارک اَڄ وی ملتان وچ ترسیاں روحاں کوں سیراب کریندے۔ حضرت حافظ جمال اللہ 29بنداں تے مشتمل ’’الف اُٹھی دھی‘‘ یادگار چھوڑی ہے ہیں سی حرفی دی زبان مٹھی ماکھی ‘ سلیس تے دل موہ گھنݨ والی ہے۔ سی حرفی دے ہر بند وچ چنگے عملاں دی تاکید دا پیغام ملدے وسیبی علامتاں دے حوالے نال ایں دنیا وچ چنگے ڳݨ کماوݨ تے اڳوں دا سامان جوڑݨ دی تلقین کیتی ڳئی ہے:
ر رت ہنجھوں روسیں جیں ݙینہ کر ڄلسِن مکلاوا
دھمیں نال سویلے تیݙا چا ڄلسِن کچاوا
ما پیو خویش قبیلے دا اِتھ کوئی نہ چلسی دعویٰ
دور جمال سُݨیندی کندھی پندھ اڳوں سُنڄ راہ دا
د دغائی سٹ دھیا دل کتݨ تے سچی
ݙیکھ سیاں نت کولھوں تیݙے بھر بھرٻہندیاں پچھی
آ دھیا مت لڳ توں میݙی نہ بݨ چھوہر کچی
ݙیکھ جمال احوال تنھاندا نیت جنھاندی سچی
ذ ذکر دا ایہو وقت ہِوی کر فکر اڳوں دا کوئی
کت وللی چھلّی دھیا وت نہ ابتر ہوئی
ٹھلے ستر دے دھروہن کنوں تند نکیری ہوئی
کل جمال تݙاں وت پوسی شاہ کوں شرم سہیوئی
حوالہ
[لکھو | ماخذ وچ تبدیلی کرو]کتاب: سرائیکی شاعری دا اِرتقاء، مصنف: ڈاکٹر نصراللہ خان ناصر، چھاپہ خانہ : جھوک پبلشرز ملتان