حضرت ام ایمن

اُمِ ایمن رضی اللہ عنہا دا اصل ناں ”برکۃ” ہئی۔ او حضور اقدس صلی اللہ تعالیٰ علیہ والہ وسلم دے پیو حضرت عبداللہ رضی اللہ تعالیٰ عنہ دی باندی ہَن، جیڑھی حضور اکرم صلی اللہ تعالیٰ علیہ والہ وسلم کوں اُنہیں دے والد ماجد دی میراث وِچوں ملی ہَن۔ اُوں نے حضور اکرم صلی اللہ تعالیٰ علیہ والہ وسلم دی بچپن وِچ ٻہوں زیادہ خدمت کیتی ہے۔ اوہی آپؐ کوں کھاؤݨا کھویندی ہَن، کپڑے پویندی ہَن، کپڑے دھوندی ہَن۔ اعلانِ نبوت دے بعد جلد ہی اُوں نے اسلام قبول کر گھدا، ول آپؐ نے اپݨے آزاد کردہ غلام حضرت زید بن حارثہ رضی اللہ تعالیٰ عنہ نال اُنہیں دا نکاح کر ݙتا۔ اُنہیں دے پیٹ توں حضرت اسامہ رضی اللہ تعالیٰ عنہ پیدا تھئے جنہیں نال رسول اکرم صلی اللہ تعالیٰ علیہ والہ وسلم اِتنی زیادہ محبت فرمیندے ہَن کہ عام طور تے صحابہ کرام رضی اللہ عنہم حضرت اسامہ رضی اللہ تعالیٰ عنہ کوں ”محبوبِ رسول” آکھیا کریندے ہَن۔ برکہ بنت ثعلبہ، جنہیں کوں عام طور تے اُمِ ایمن دے ناں نال ڄاݨا ویندا ہے، پیغمبرِ اسلام صلی اللہ علیہ وسلم دے والد بزرگوار عبداللہ بن عبدالمطلب دی خادمہ ہَن۔ حضور صلی اللہ علیہ وسلم دے منہ بولے پُتر زید بن حارثہ نال اُنہیں دا نکاح تھیا تے خلافتِ عثمان غنی وِچ وفات پاتی۔