حسن بخش شہداد پوری

حسن بخش شہداد پوری 1262ء وچ پیدا تھئے اتے جمادی الاول 1318ھ کوں وفات پاتی۔ ضلع سانگھڑ دے قصبے ݙٹھرو دے باشندے ہن۔ حمل خان لغاری توں متاثر ہن۔ سئیں حسن بخش دا سلسلہ نسب حضرت سید عبدالقادر جیلانی نال ملدے۔ ہِیں نسبت انھاں دا خاندان جیلانی سید سݙویندے۔ انھاں دے والد پیر گلزار علی شاہ ہن۔ حسن بخش اپݨے نانے دی سرپرستی وچ عربی فارسی دی چنگی تعلیم حاصل کیتی۔ آپ کوں مطالعہ دا ٻہوں شوق ہئی۔ آپ کوں ملاکھڑے دا وی خاص شوق ہئی۔ شکار دا وی ݙاڈھا شوق ہئی۔ آپ دی پہلی شادی عارف المولیٰ دی پر ݙاݙی تے پیر علی بخش دی دختر نال تھئی۔ جیں وچوں ہک پتر ڄمیا۔

محبوب مٹھا من ٹھار میݙا میں روز ݙیکھاں تیݙیاں راہیں …آ کݙاہیں

دل جوش تیݙے بے ہوش کیتی چودھار برہا دیاں بھاہیں …آ کݙاہیں

سوز فراق دے سوال سڑاون دل اندر دیاں دھائیں …آ کݙاہیں

آ ہمخیال تھیویں ہݨ نال حسن بخش پھڳن ٻاجھ نہ لائیں …آ کݙاہیں

…………

اڳن اساݙے آ مٹھا دلبر میں تاں تیݙی گولڑی آں

اڳن توں آنویں پھیرا پانویں

جند جان میں ساری گھولڑیاں

شمس قمر وت ہیر جواہر

بھر بھر گھولاں جھولڑیاں

نسدن سکدی کھڑی پکاراں

شب روز تیݙی میں ڳولڑیاں

ہر دم ہرہر ہیں اندر وچ

ہے ہے تیݙیاں ہولڑیاں

نال نماݨی مرک الانویں

ٻاجھ وچوں لب چولڑیاں

بات زبانی رب کا آکھے

عشق والیاں کوں ٹولڑیاں

حسن بخش ہر دم موج بحر دیاں

چھوٹیاں آوݨ چھولڑیاں

حوالہ

کتاب: سرائیکی شاعری دا اِرتقاء، مصنف: ڈاکٹر نصراللہ خان ناصر، چھاپہ خانہ : جھوک پبلشرز ملتان