حامد علی شاکرؔ
اصل ناں حامد علی
تخلص شاکرؔ
جٖمݨ 1940ء
تعلیم میٹرک
پیشہ ریٹائر ٹیچر
فون نمبر 0334 7637528
جاہ پتہ کوٹلہ دیوان تحصیل جام پور ضلع راجن پور
حامد علی شاکر زبر دست شعری قوت دے حامل فطری شاعر ہن ۔ کوشش دے باوجود میݙی انہاں نال فون تے ڳالھ بات نہ تھی سڳی ۔ کیوں جو اوں ویلے آپ بیمار ہن تے انہاں نال الاوݨ ٻولݨ دی ممانعت ہئی۔ بہرحال میں آپ دی ہک غزل کہیں حوالہ جاتی کتاب اچوں پہلے گھدی ہوئی ہئی ۔ تے کوائف ہک دوست دے ذریعے گھن کے میں حامد شاکر صاحب کوں کتاب اچ درج کر ݙتے ۔بقول جمشید احمد کمتر رسولپوری حامد شاکر یکم دسمبر1940کوں مہر جند وݙا سیال دے گھر پیدا تھئے ، میٹرک تک تعلیم حاصل کیتی ۔جݙاں جو عملی زندگی دا آغاز 1964ء کنوں بطور سکول ٹیچر کیتا ۔تے ول 2000ء وچ ریٹائر تھی ڳئے۔
شاعری دا آغاز آپ نے 1972ء کنوں کیتا ۔ تے آپ دیاں کئی شعری کتاباں وی چھپ چکیا ہن پر میں انہاں دی تفصیل نہیں جٖاݨدا ۔ جݙاں جو میݙے سامݨے آپ دی صرف ہک غزل ہے جیکوں پڑھ کے اندازہ تھیندے جو حامد شاکر صاحب ہک پختہ کار مشاق شاعر ہن، تے سرائیکی شاعری اچ آپ دا مقام تے مرتبہ ٻہوں بلند ہے۔ تے آؤ ہُݨ حامد شاکر صاحب دی غزل ملاحظہ فرماؤ!
(1)غزل
[لکھو | ماخذ وچ تبدیلی کرو]اے کیجھیے حسین اِن جو کولھوں ٻلہیندن
پوا ویس شیشے دا پتھّر مریندن
اے پاݨی دیوچ ریت دا گھر بݨا کے
محبت دی سب کیتی کرتی ٻوڑیندن
میں یاریں کوں وی خوب پرکھیا ہے جڳ تے
دفن دے بہانے کفن پئے لہیندن
بدن وچ تاں قطرہ لہو دا نی رہ ڳیا
ولا او پئے کیوں ویلݨے وچ ولیندن
ازل توں ہے دستور اہلِ جفا دا
چڑھا تے چا پوڑی دے ݙاکے کپیندن
چھڑا اپݨیں ہتھیں کوں رنگݨ دی خاطر
میݙی آرزو کوں پئے چِٹ تے کوہیندن
نواں ظلم شاکرؔ ݙٹھم میکدے وچ
ادا نال پیاسے دا ساغر بھنیندن
٭٭٭