حافظ محمد شاعر
1100ھ؍1688ء
آپ ملتان دے رہݨ والے بزرگ ہن۔ حافظ محمد دی زندگی دے حالات کہیں کوں معلوم کینی۔ سوائے ایندے کہ مولانا عبداللہ دے فقہی رسائل تے انھاں حواشی لکھیے۔ ڈاکٹر مہر عبدالحق انھاں دا عہد 1100ھ دی ابتداء منیندن۔(99)۔ نورنامے والی کار حافظ محمود دے معراج نامے کوں وݙی شہرت حاصل تھئی۔ اے معراج نامہ وی صدیاں توں سرائیکی وسیب دے گھر گھر وچ پڑھیندا پے۔ بے شمار لوکاں کوں اے پورا زبانی یاد ہے۔ ایں معراج نامے دے 26بند ہن۔ حمد توں آغاز تھیندے ول نعتیہ بند ‘ ایندے بعد صحابہ کرامؓ دی منقبت ‘ اڳوں معراج دا بیان ۔ حضور کریمؐ دے معجزات ‘ ہجرت مدینہ ‘ غارِ حرا وچ قیام دے بعد واقعہء کربلا تے حضرت حسینؑ دی شہادت دا بیان ہے تے چھیکڑ وچ دُعا اُتے اے معراج نامہ توڑ پُڄدے۔ ایں طرح اے معراج نامہ اپݨی نوعیت دا ہک نویکلا معراج نامہ ہے جیندے وچ کجھ ٻئے مضامین دا اضافہ وی کیتا ڳے ۔ معراج نامے دی زبان قدیم ہے ۔ شاعری رواں تے انتہائی عقیدت بھری ہے۔
توں ڳیوں معراج تے منصب ݙتو پروردگار
کنڈ مبارک تے لڳی مھر نبوت خال دار
شانِ پاک اعلیٰ تے افضل توں خدا دا دوستدار
توں پیارا شہ سونہارا رب نوازیو توں سدا
توں اڳے فریاد میݙی یا محمدؐ مصطفیٰ
تیݙا منصب رب ودھایا روبرو عزت ڈھی
ݙو کمانوں تھوڑی رب تے توں وچالے وتھ رہی
رب آہا یا توں آہؤں نہ ونڄ سڳیا اوں جا وحی
ڳالھیں ہَن مخفی دیاں مَعَلہ کیتیاں تیکوں خدا
توں اڳے فریاد میݙی یا محمد مصطفیٰؐ
حوالہ
[لکھو | ماخذ وچ تبدیلی کرو]کتاب: سرائیکی شاعری دا اِرتقاء، مصنف: ڈاکٹر نصراللہ خان ناصر، چھاپہ خانہ : جھوک پبلشرز ملتان