حافظ عبدالکریم دلشاد

حافظ عبدالکریم دلشاد احمد پور شرقیہ دے رہݨ والے ہن۔ آپ محکمہ تعلیم وچ استاد ہن۔ دلشاد صاحب اپݨے آپ کوں مولانا نصیر الدین خرم دا شاگرد سݙویندے ہن۔ خود وی ہک استاد شاعر ہن۔ ایں دور وچ روایتی انداز دی شاعری کرݨ والے اکثر شعراء انھاں دے شاگرد ہن۔ سرائیکی زبان دے ہک مہاندرے شاعر فیض محمد دلچسپ وی آپ دے شاگرد ہن۔ شاعری وچ ٻہوں زور اَتے روانی ہے۔ زیادہ تر کافی‘ نظم تے ݙوہڑے لکھدے ہن۔ 1980ء وچ آپ دا انتقال تھی ڳے۔

کافی

لئی زلف کھڑی ہے لٹکے

ول پیچ کھاوے وٹ وٹ کے

لِٹ دھار لَٹک لَٹکاوے

سجھ ݙیکھ لسک شرماوے

چن جُھک دیدار کوں آوے

واللیل کھڑی سر سٹ کے

وچ سردی زلف آئینہ

وچ گرمی نیک نگینہ

تھیا کوثر پگھر پسینہ

ڳئی حور پری بھر مٹکے

دلشاد ݙٹھم ایہے رمکاں

ایہیں زلف کنڈھل دیاں دھمکاں

اساں روز چُمیسوں چمکاں

ٻیا  کون کوئی ساکوں   ہٹکے

حوالہ

کتاب: سرائیکی شاعری دا اِرتقاء، مصنف: ڈاکٹر نصراللہ خان ناصر، چھاپہ خانہ : جھوک پبلشرز ملتان