حافظ جمال اللہ

1160ھ توں1226ھ؍1747ء توں1811ء

سرائیکی زبان دی صوفیانہ شاعری کوں ہک نواں عروج حضرت حافظ محمد جمال دے فلسفے فکر تے تعلیمات نال ملدے۔ حضرت حافظ جمال پہلے بزرگ ہن جنھاں ملتان وچ چشتیہ سلسلے کوں رواج ݙتا۔ آپ ٻہوں وݙے عالم دین واعظ تے اللہ دے رتے درویش ہن۔ آپ عربی فارسی تے سرائیکی زبان اِچ شاعری کیتی۔ آپ دی مشہور سی حرفی چرخہ نامہ دنیادی بے ثباتی دے پس منظر وچ چنگے عمل کماوݨ دی تبلیغ اے۔ 29بنداں دی ایں شاندار شعری تصنیف وچ زبان انتہائی سادہ دل چھکویں تے روزمرہ زندگی دے تجرباں نال ڳانڈھویں ہے۔ ایں سی حرفی دا ہر بند نیک عمل تے صالح زندگی دے فلسفے دی سوکھے انداز اِچ تعلیم ݙیندے۔ انسان ایں دنیا وچ آ تے اپݨے آوݨ دا وݙا مقصد وِسارٻہندے اوندی زندگی دی شام تھیندی اے تاں مکلاوے ویلے اوندے پلے کجھ نی ہوندا۔ خالی ہتھ ملیندا اڳلے گھر رخصت تھیندے۔ حضرت حافظ جمال چرخہ کتن کوں نیک عمل کماوݨ ، ما پیو دے گھر کوں اے دنیا ، اتے سہورے گھر کوںاڳلے جہان دی علامت دے طور استعمال کیتے۔ او فرمیندن غفلت دی نندر چھوڑ اے ویلا ول ہتھ نہ آسی۔ چنگے ڳن کما گھن جیڑھے اڳلے جہان تیݙے کم آسن ۔اڳلی دنیا دے سفر تے کلہا ونڄنیں۔ اے دنیا دی رونق چھڑی ݙو چار ݙیہاڑے ہے مکلاوے توں پہلے پہلے کجھ راہ دا سامان جوڑ گھن۔

غ غریبی پکڑ دھیا توں نہ کر اے مغروری

ایں دنیا اعتبار نہ کوئی حرص کنوں کر دوری

شوہ دے نال محبت تیݙی شالا ڈُھکے پوری

جنھاں کیتی پاک کمائی لہسن جمال مزوری

سوہݨی دھی اے دنیا عارضی ٹکانہ ہے ۔ ایں دنیا دا سب کجھ اِتھاہیں چھوڑ تے اڳلے جہان ونڄݨاں پوندے۔صرف اللہ سوہݨے دا فضل اُوں ویلے کم آندے ۔ محل حویلیاں کجھ نی پکردا۔

ظ  ظلم قہر اندھاری دے وچ آیا ڄال اکلیسی

ناں اُتھ خویش قبیلہ ہوسی ناں کئی سنگ سہیلی

چھوڑ ویسیں تمام دھیا گھر ٻار محل حویلی

فضل جمال اللہ دے ٻاجھوں کوئی نہ ہوسی بیلی

حوالہ

کتاب: سرائیکی شاعری دا اِرتقاء، مصنف: ڈاکٹر نصراللہ خان ناصر، چھاپہ خانہ : جھوک پبلشرز ملتان