حافظ احمد یسوی
خواجہ حافظ احمد یسوی نقشبندی نقشبندیہ دے بزرگ اتے صاحب خوارق و کرامات ہن۔
تساں خواجہ احمد یسوی ترکستانی دی اولاد وچوں ہن۔ اپݨے وطن توں نکل کے عرب دے تمام علاقے مکہ، مدینہ، بیت المقدس، شام، عراق، روم اتے روس وغیرہ دی سیاحت کیتی۔ ایندے بعد ہندوستان دا رُخ کیتا۔ ہندوستان توں کشمیر چلے ڳئے۔ اتھاں ہک جاء پسند آئی اتے مخلوق خدا توں کنارہ کش تھی کے عبادت و ریاضت وچ مشغول تھی ڳئے۔ انہاں شیخ ملا شاہ دی خانقاہ تے کݙہیں کݙہیں تشریف ڳھن ویندے ہن۔ کجھ سال انہاں معمولات وچ جݙݨ گزرے تاں خواجہ نظام الدین بن معین الدین بن خواجہ خاوند محمود انہاں دی خدمت وچ حاضر تھئے اتے اپݨے نال گھن ونجݨ تے آمادہ کیتا اتے اپݨے شہر وچ انہاں کیتے ہک رہائش دی جاء وی مختص کر ݙتی۔
خواجہ نظام الدین دی وفات دے بعد انہاں دے جانشین خواجہ نور الدین محمد آفتاب دے مرید تھی ڳئے اتے سلوک نقشبندیہ دی تکمیل کیتی۔ مخلوق خدا انہاں طرف بھڄدی آندی ہئی اتے فیض یاب تھیوݨ لڳی۔
تساں کجھ عرصہ تک اینہہ مسند ارشاد تے سالکان طریقت دی تربیت کریندے رہے اتے 3 ذی الحجہ 1114 وچ وفات پاتی اتے کشمیر وچ مدفون ہن۔