حادثہ
دھریجہ نگر دے نال لنگھݨ آلی سڑک پہلے کچی ہئی ۔ ولا سولنگ بݨی ، میݙی سنبھل واݨ ءِچ اے لُک آلی سڑک ہئی ، پر سڑک چھوٹی ہئی ،ݙو گاݙیں دا کراس تھیوے ہا تاں ݙوہائیں کوں ہک پھیتہ تلے لہاوݨا پمدا ہا ۔ بساں تھولیاں ہن ، ٹانگے ڈھیر ہوندے ہَن ۔ احباب پنجند بعد ءِچ اسلم ٹرانسپورٹ وی آئی ۔ کئی گھنٹیں بعد کوئی بس اَمدی ہئی ۔ سڑک تے ٹریکٹر ٹرالیاں اَمدیاں ویندیاں رہ ویندیاں ہن۔ سن تے تاریخ میکوں یاد کینھی ، اُنہتر ستر دی ڳالھ ہوسے ۔ ہک واری اَدھ رات کوں زور دار پھاکا تھیا ۔ پھاکا اتنا زوردا جیویں بم پھٹیا ہووے ۔ سُتے لوک ترپ مار تے اُٹھی بیٹھے ، تے سڑک آلے پاسے بھڄ پے ،ہر کہیں لالٹین ،بیٹریاں ٻالیاں ، سڑک تے ڳیوسے تاں اسیݙے کھوکھے دے سامھے ٹرالی موندھی تھی پی ہئی تے ٹریکٹر پرے ڳیا پیا ہا ۔ ٹرالے تلے چیکڑ ٻاکڑ ہئی، سارے وستی آلئیں رَل تے ٹرالی کوں سدھا کیتا ، ڈھیر ساریاں عورتاں تے ٻال مر ڳے ہن تے ڈھیر ساریں کوں ٹانگے تے چا چا تے ہسپتال پُڄایا ڳیا ۔ اے لوک عیسائی ہَن تے شئیت کہیں فوتگی تے ویندے پے ہن ، ݙو ترائے مرد ٹریکٹر تے ہَن تے ٹرالی عورتیں نال ٹب ہئی ۔ ڈھیر ساریاں عورتاں مڑکا تُرٹݨ نال ہلاک تھیاں ہَن ،اسیݙی وستی آلے مرد عورتاں سارے روندے کھڑے ہَن ، وستی ءِچوں آناً فاناً کھٹڑے آ ڳے ،لوگ پاݨی تے کھیر چا آئے ، عیسائیں وستی آلئیں دی چنگائی کوں ایجھا منیا جو ہُنائیں دے سکے شکریہ سانگے اَمدے رہ ڳے ۔میکوں یاد اے انگریز اَمدے وی رہ ڳے ، جیرھا اَمدا ہا میݙے ابّے سئیں کنوں حال حویلہ گھندا ہا ، ہک جیپ تے ذال مرد انگریز آئے ، ݙو پاکستانی وی نال ہَن ۔ حادثے آلی جاہ کھڑے رہ ڳے ۔ حال حوال چاتا تے میݙے ابّے سئیں کوں سیلوٹ کیتا انگریزی ء ِ چ کجھ آکھیا ، نال آلے ݙسیا جو اے آکھدے میں وستی آلئیں کوں سلام کرینداں ۔
حوالہ
[لکھو | ماخذ وچ تبدیلی کرو]کتاب: مُہاڳ، مصنف: ظہور احمد دھریجہ ، ناشر: جھوک پبلشرز ، ملتان