حاجی نور محمد شیر ڳڑھی

حاجی نور محمد ہک وݙے عالم دین ہن۔ حاجی صاحب ݙٹھا کہ لوکاں وچ ناخواندگی دی وجہ توں پیشہ ور مُلاّں انھاں کول طرح طرح تے ٹھڳیندے راہندن۔ ایں واسطے آپ نے 1140ھ وچ اسلامی فقہ دے مسئلیاں بارے ہک رسالہ منظوم کیتا ایں رسالے وچ میّت کفن دفن ‘ نماز ِ جنازہ تے دعا وغیرہ دے مسئلے بیان کیتے ڳن۔ ایں طرح مولوی صاحب اوں وقت وی ہک اہم ضرورت کوں مثنوی دے انداز وچ منظوم کر تے خلق دی خدمت کیتی او اپݨے ایں منظوم رسالے میّت نامہ دا سن تصنیف ݙسیندن:

سن یاراں سو آہی چالھی تݙݨ اساں اے گل سنبھالی

چوݙاں ویہاں280)بیت) بݨائے مسئلے ظاہر آکھ سݨائے

حاجی نور محمد شیر ڳڑھی دے باقی حالات زندگی نہیں ملدے صرف اتنا معلوم تھیندے کہ او شیر ڳڑھ دے رہݨ والے ہن:

حاجی نور محمد کہندا

شیر ڳڑھ سندھ والی وچ راہندا

وستیاں وچ ملاݨے رہندے

گھن خلقاں تھی ٹھڳیاں کھاندے

نہ ڄاݨن حیلہ نہ اسقاط

نہ ڄاݨن غسل کفن دی بات

پاڑ نہ ڄاݨن حقدار کفن دا

نہ کجھ ڄاݨن غسل دفن دا

لیکھا چوکھا سب کچھ ڄاݨن

پر مسئلے دل تھیں مول نہ آنن

ملاں قاضی ہو کر ٻہندے

نال مغروری جاہل راہندے

آپوں جوڑویں مسئلے کہندے

وبال قیامت سر تے لیندے

انھاں واسطے فکر کتوسے

جیویں   وچ کتاباں  ݙٹھوسے

حوالہ

کتاب: سرائیکی شاعری دا اِرتقاء، مصنف: ڈاکٹر نصراللہ خان ناصر، چھاپہ خانہ : جھوک پبلشرز ملتان