حاجی نبی بخش شوق کربلائی

حاجی نبی بخش شوق کربلائی کوں پڑھ تے اینویں معلوم تھیندے جو علم دا ہک دریا ہے جیڑھا موجاں پیا مریندے۔ آپ دی نثر توں شوقِ کربلائی ‘ علمیت ‘ عربی فارسی زباناں تے عبور ‘ دینی تعلیمات تے دسترس تے زورِ بیان دا منہ ٻولیندا ثبوت ملدے ۔ اینویں آپ دی شاعری وچ وݙی روانی ‘ لفظاں دی پُرکاری ‘ جوش تے حقیقی جذبیاں دی کھری عکاسی ݙسدی ہے۔ آکھیا ونڄ سڳدے جو شوق کربلائی سارے مرثیہ گو شاعراں وچ اپݨے ہک وکھرے مقام دے مالک ہن۔ انہاں دا اندازِ بیان تے نثر دا اندازِ تحریر ٻہوں پُر کشش ہے تے انتہائی سُوہݨپ رکھدے۔ حاجی نبی بخش شوق کربلائی عاشق ملتانی دے سب توں وݙے شاگرد ہن۔ مرثیہ دے علاوہ آپ نے سیرت رسول اللہ صلی اللہ علیہ وآلہ وسلم وی لکھی ہے ۔ سیرت دی کتاب او مکمل نہ کر سڳیئے۔ صرف5ھ تئیں پنج سو صفحات تحریر کر سڳیئے۔ آپ دیاں چھپݨ والیاں کتاباں دے ناں اے ہن۔ انوارِ ذوق ‘ سامانِ شوق ‘ انوارِ شوق ‘ اخبار شوق ‘ اقرار شوق ‘ دبستانِ شوق‘ سامانِ غم ‘ وغیرہ ‘ گفتار ذوق وچوں کلام دا نمونہ۔

قاسمؑ دی ماء رو کر آکھیے ماریا سہریانوالا

ماء اکبرؑ دی آکھے ماریا اکبر ماہ متوالا

ماء اصغرؑ دی آکھے ماریا ہے اصغر گل لالہ

ہے دعا وچ دنیا دے کئی ایں نہ اُڄڑے شالا

ماریا موت عزیزاں دا بھی نیر وہیندا آندے

وین فراق دے سُݨ کے قیدی صبر کریندا آندے

ݙیکھ کے لاشے بھائیاں دے دل داغ اُٹھیندا آندے

صبر کرو  مستوراں  کوں تعلیم کریندا  آندے

حوالہ

کتاب: سرائیکی شاعری دا اِرتقاء، مصنف: ڈاکٹر نصراللہ خان ناصر، چھاپہ خانہ : جھوک پبلشرز ملتان