حاجی شاہ فائق

ترنڈہ محمد پناہ کچی محمد خان تحصیل احمد پور شرقیہ دے رہݨ والے ہن ۔ وݙے مشہور واعظ تے عبادت گزار ہن۔ آپ دی شاعری عشقیہ تے عارفانہ ہے۔ مگر آپ کوں طنزو مزاح لکھݨ دا وی ٻہوں شوق ہئی۔ وعظ کریندے ہَن تاں تقریر دے دوران مزاحیہ شعر تے مزاحیہ ڳالھیں وی ٻہوں سُݨویندے ہن۔ ایہو وجہ ہئی کہ ڄٹ ݙاہ ݙاہ میل توں اُنھاں دے واعظ سُݨن آندے ہن۔ ہک واری انھاں کوں شادی دا کانڈھا آیا۔ اُتھاں وعظ کیتونے شادی والیاں ݙوں روپے چھڑے مولوی صاحب کوں ہدیہ پیش کیتا۔ مولوی صاحب او ݙوں روپے نیندر اِچ ڳݨوا چھوڑئیے ۔ ایندے اُتے حاجی شاہ فائق ہک مزاحیہ ٹھمری لکھی جیندا مُکھڑا اے ہا:

ݙوں لیئے ݙوں ݙتیہے سولݨ سولݨ دھا

حاجی شاہ فائق دا ہک مولودی ہئی رنگ دا کالا ۔ حاجی شاہ ہک واری اوکوں ساوݨ دے موسم اِچ دعوت نامہ بھیجیا جیندے کجھ ٻول اے ہن:

لڳی آ ساوݨی جڑ بݨ

سینگیاں سیاں ڳاوݨ دھاون

مٹھا من ٹھار زنگی آ

گݙاں کھوتی کوئی منگی آ

اینویں ملدیں جے ہی پھاسی

کُنی نالش کریں تن تے

نہ چڑ ونڄ ڈھونگری کھن تے

جے چڑویسیں تاں داں داں داں

فائق  تانگھاں  لہا  ٻہسی آ

حوالہ

کتاب: سرائیکی شاعری دا اِرتقاء، مصنف: ڈاکٹر نصراللہ خان ناصر، چھاپہ خانہ : جھوک پبلشرز ملتان