جے پور دے صحافی دوست

جے پور پندھراں لکھ دی آبادی دا شہر ہے ۔ اِتھاں 4پرائیویٹ تے 3گورنمنٹ دے ٹی ۔وی چینل کم کریندے پئین ۔ ترئے صحافی دوست جے پور ٹیشن تے ظہور دھریجہ کوں مِلݨ کیتے آئے ۔ اُنہاں وچ انڈین ٹائم دا نمائندہ دُشٹ گاندھی ݙسیا جو جے پور وچ ترئے گورنمنٹ تے چار پرائیویٹ یونیورسٹیاں ہن ۔ کئی ٹی ۔وی چینل کم کریندے پئین ۔ 7,6اسٹیٹ پیپرز (صوبائی اخبار) تے4‘3نیشنل نیوز پیپرز چھپدن۔ سٹیٹ نیوز پیپرز ہندی وچ اَتے نیشنل نیوز پیپرز انگریزی وچ ہِن ۔ اُنہاں دے اپݨے اخبار دی اشاعت ݙٹھ لکھ روزانہ ہے ۔ دشٹ گاندھی دے نال اے ٹی۔ وی چینل دے ایش مدھو تلوار تے پریم چند گاندھی وی ہَن ۔ جہڑیلے ظہور دھریجہ ݙسیا جو جے پور ٹیشن تے ترے صحافی دوست مِلݨ سانگے آندے پئین تاں میں آکھیا ساکوں ݙاڈھی بُکھ لڳی ہے ساݙے کیتے روٹی یا پَھل فروٹ ضرور گھن آسن۔ پر اوہ خالی ہتھ آئے ۔ اُنہاں ارشاد امین کیتے ہندی رسالیاں دا ہک پیکٹ ݙتا ۔ اللہ اللہ خیر سلاّ۔ سچ ہے ہندو کݙانہیں سخی نھیں تھی سڳدا ۔ اساں بُکھّے ریہوسے ۔ اُمیداں تے نہ صرف پاݨی پھر ڳیا بلکہ اُنہاں دے خاں پور لنگھݨ ویلے اُنہاں دی جہڑی خدمت کیتی ڳئی ہئی اوہ وی کھوہ کھاتے چلی ڳئی ہئی۔ نیکی کرکے جتاوݨ تاں غلط ہے پر اُنہاں دا رویہ کہڑا چنڳاں ہا ۔ خیر اُنہاں نال کجھ دیر گپ شپ تھئی ۔ گݙی ٹُری تاں ’’گاندھی نگر‘‘ دا ٹیشن آیا ۔ کھٹی پورا ‘ جِھر ‘ منڈار دے ٹیشن گزر ڳے پر ’’دوسہ‘‘ دے ٹیشن تے گݙی رُک ڳئی ۔ اِتھاں ساکوں گݙی دے سڄے پاسے پہاڑ ولا نظر آوݨ پئے ڳئے ۔ دوسہ وچ تازہ تازہ مینہ وَسیّا پیا ہا ۔ موسم ݙاڈھا سوہݨاں تے ہوا ٹھڈّی ہئی ۔ دوسہ دا شہر چنڳا ݙسدا ہا ۔ اِتھائوں گݙی وچ ہک بارات (جنڄ) چڑھی ۔ اوہ بارات گݙی وچ راجستھانی گیت ڳانڈے آئی ۔اُنہاں دی لَے ‘ الفاظ تے انداز شادی دے سرائیکی گیتاں وانگ ہا ۔ اڳوّں ’’بنکری‘‘ آیا۔ ہُݨ پہاڑ والا کھٻے پاسے آ ڳئے ۔ ایہ سطح مرتفع دا علاقہ ہا ۔ اڳوّں ’’بندیکوئی‘‘ جنکشن آیا ۔ گݙی رُک ڳئی ۔ کجھ دیر بعد’’ ضلع الور‘‘ شروع تھی ڳیا ۔ میکوں بہاول پور دا تابش الوری یاد آ ڳیا جیندے کولوں پچھو ہا جو اپݨے شہر الور وَلا ویندیں تاں اوہ کݙانہیں آہیں نہ کرے ہا ۔ بھلا پاکستان جیہیں مزے الور اِچ کتھاں ۔ اگلٖے ٹیشن’’ راج ڳڑھ‘‘تے گݙی رُکی ۔ ایں ویلے شام دے 6:30وڄ چُکے ہَن ۔ گݙی وچ تے اجمیر وچ اساں راجستھانی تریمتیں کوں ساڑھی پاتا ݙٹھا ہے ۔ اوہ عام لوکاں کنوں مختلف انداز اِچ ساڑھی پیندیاں ہَن ۔راجستھانی تریمت دا سارا بُت ساڑھی دے اندر لُکیا رہندے ۔ اُنہاں دی ساڑھی دا ہک پَلّوں سِر دے اُتے ہوندے۔ وکھیّاں تے پاسے وی کڄیّ ہوندن ۔ شام ست وڄے الور دا ٹیشن آ ڳیا ۔ الور اجمیر تے دِلی دے وچکار ہے ۔ ایہ ہک سوہݨاں ٹیشن ہے ۔ پلیٹ فارم وݙا سارا ہے ۔ جݙانہ الور ہک ریاست ہئی اے ٹیشن ہوں زمانے دا ہے ۔ ایندی تعمیر قدیم کلچر دا اظہار کریندی پئی ہئی ۔ گݙی ہر ٹیشن تے مختصر وقت کیتے رُکدی ہئی ۔ 8:10وڄے کھیرتھل آیا ۔ (غالباًایہو کیتھل ہا) گݙی رُک ڳئی صرف ترے منٹ کیتے۔ 8:15تے ریواڑی آیا 8:59تے گُڑگانوں آ ڳیا ۔اِتھاں وی گݙی رُکی ۔ 9:25تے اَساں دِلّی کینٹ پُڄ ڳئے ہاسے ۔ ایکوں پُراݨی دِلّی آکھیا ویندے ۔ نویں دِلّی الڳ ہے۔

حوالہ

کتاب: دِلّی ڈھائی کوہ۔ مصنف شوکت مغل، چھپیندڑ: جھوک پبلشرز ‘ ملتان