جیکوبس ہینریکس وین ٹ ہوف

جیکوبس ہینریکس وین ٹ ہوف

جیکوبس ہینریکس وین ٹ ہوف جونیئر (30 اگست 1852 – 1 مارچ 1911) ہک ڈچ طبیعیات دان کیمیا دان ہا ۔ او اپݨے وقت دا ہک ٻہوں با اثر تھیوریٹیکل کیمیا دان ہا ، وین ٹ ہوف کیمسٹری اچ نوبل انعام دا پہلا سوبھ وند ہا ۔ اوندے شاندار کم کیمیکل ایفنیٹی ، کیمیکل ایکویلیبریم ، کیمیکل کائنیٹکس تے کیمیکل تھرمو ڈائنامکس دے جدید نظریے دی بنیاد رکھی ۔ 1874 اچ اپݨے پمفلٹ اچ ، وین ٹ ہوف ٹیٹراہیڈرل کاربن ایٹم دا نظریہ پیش کیتا تے سٹیریو کیمسٹری دی بنیاد رکھی ۔ 1875 اچ ، انہاں ایلینز تے کیومولینز دے درست ڈھانچے دی پیش گوئی کیتی تے نال ای انہاں دی ایکسیئل کائرلٹی دی وی ۔ انہاں کوں اڄوکے دور دے فزیکل کیمسٹری دے بانی اچوں ہک سمجھیا ویندے ۔

جیوݨ جوڳ

ست ٻالاں اچوں تریجھا ٻال ، وین ٹ ہوف 30 اگست 1852 کوں روٹرڈیم ، نیدرلینڈز اچ پیدا تھیا ۔ اوندے پیو دا ناں جیکوبس ہینریکس وین ٹ ہوف سینئر ہا ، جیڑھا ہک طبیب ہا ، تے اوندی ماں دا ناں الیڈا کولف وین ٹ ہوف ہا ۔ ٻلپݨ توں ای اینکوں سائنس تے فطرت اچ دلچسپی ہائی تے او اکثر نباتاتی سیر اچ حصہ گھندا ہا ۔ اپݨے ابتدائی سکول دے سالاں اچ ، انہاں شاعری تے فلسفے اچ ٻہوں دلچسپی ظاہر کیتی ۔ او لارڈ بائرن کوں اپݨا آئیڈیل سمجھدا ہا ۔

اپنڑے پیو دی مرضی دے خلاف ، وین ٹ ہوف کیمسٹری پڑھݨ دا فیصلہ کیتا ۔ پہلے ، انہاں ستمبر 1869 اچ ڈیلفٹ یونیورسٹی آف ٹیکنالوجی اچ داخلہ گھدا تے 1871 تئیں پڑھیا ، جݙاں انہاں 8 جولائی کوں اپݨا آخری امتحان پاس کیتا تے کیمیکل ٹیکنالوجسٹ دی ڈگری حاصل کیتی ۔ انہاں ݙو سالاں اچ اپݨے سارے کورس پاس کر گھدے ، حالانکہ پڑھݨ دا مقررہ وقت ترائے سال ہا ۔ ول انہاں لیڈن یونیورسٹی اچ کیمسٹری پڑھݨ کیتے داخلہ گھدا ۔ ول انہاں جرمنی دے بون اچ اگست کیک نال تے پیرس اچ ایڈولف ورٹز نال تعلیم حاصل کیتی ۔ انہاں 1874 اچ یوٹریچٹ یونیورسٹی اچ ایڈورڈ مولڈر دے ماتحت ڈاکٹریٹ دی ڈگری حاصل کیتی ۔

1878 اچ ، وین ٹ ہوف جوہانا فرانسینا میس نال شادی کیتی ۔ انہاں دیاں ݙو دھیاں ہن ، جوہانا فرانسینا (1880–1964) تے الیڈا جیکوبا (1882–1971) ، تے ݙو پتر ہن ، جیکوبس ہینریکس وین ٹ ہوف III (1883–1943) تے گورٹ جیکب (1889–1918) ۔ وین ٹ ہوف 58 سال دی عمر اچ ، 1 مارچ 1911 کوں برلن دے نیڑے سٹیگلٹز اچ تپ دق دی وجہ نال فوت تھی ڳیا ۔

نامیاتی کیمسٹری

وین 'ٹ ہوف اپݨی ابتدائی شہرت نامیاتی کیمسٹری دے شعبے اچ حاصل کیتی ۔ 1874 اچ ، انہاں آپٹیکل ایکٹیویٹی دے مظہر کوں ایہ فرض کریندے ہوئے بیان کیتا جو کاربن ایٹم تے انہاں دے ہمسایہ ایٹم دے درمیان کیمیائی بانڈ ہک باقاعدہ ٹیٹراہیڈرون دے کونیاں دی طرف ہدایت کیتے ویندن ۔ انہاں ترائے جہتی ڈھانچے فطرت اچ پائے ونڄݨ والے آئسومرز کوں بیان کیتا ۔ ایندا کریڈٹ فرانسیسی کیمیا دان جوزف لی بیل نال وی شیئر کیتا ویندے ، جیڑھا آزادانہ طور تے اینہی خیال نال سامݨے آیا ہا ۔

ڈاکٹریٹ دی ڈگری ملݨ توں ترائے مہینے پہلے ، وین ٹ ہوف ایں نظریے کوں شائع کیتا ، جیڑھا اج سٹیریو کیمسٹری دی بنیاد سمجھیا ویندے ، پہلے 1874 دے خزاں اچ ہک ڈچ پمفلٹ اچ ، تے ول اڳلے مئی اچ ہک نکی فرانسیسی کتاب La chimie dans l'espace اچ ۔ ہک جرمن ترجمہ 1877 اچ شائع تھیا ، جݙاں وین ٹ ہوف کوں صرف یوٹریچٹ دے ویٹرنری سکول اچ نوکری مل سڳی ہائی ۔ انہاں ابتدائی سالاں اچ ایندے نظریے کوں سائنسی برادری وݙی حد تئیں نظر انداز کیتا تے ہک مشہور کیمسٹ ، ہرمین کولبے ایندے اتے سخت تنقید کیتی ۔ کولبے لکھیا:

"یوٹریچٹ دے ویٹرنری سکول دے ڈاکٹر جے ایچ وین ٹ ہوف کوں ، ظاہر ہے ، ٹھیک کیمیائی تحقیق پسند کائنی ۔ انہاں اینکوں زیادہ آسان سمجھیا جو پیگاسس (ظاہر ہے ویٹرنری سکول توں ادھار گھدا ہویا) تے سوار تھیو تے اپݨے 'La chimie dans l’espace' اچ اعلان کرو جو ، کیمیائی پارناسس دی چوٹی تئیں اپݨی جرأت مندانہ پرواز اچ ، ایٹم اینکوں کائنات اچ کینجھے ترتیب ݙتے ہوئے نظر آئے ۔ "

تاہم ، تقریبا 1880 تئیں ، جوہانس وسلیسینس تے وکٹر میئر جئیں اہم کیمسٹاں ولوں وین ٹ ہوف دے نظریے دی حمایت نال اینکوں سنڄاݨ ملی ۔

فزیکل کیمسٹری

1884 اچ ، وین ٹ ہوف کیمیکل کائنیٹکس تے اپݨی تحقیق شائع کیتی ، جیندے اچ انہاں گرافکس استعمال کریندے ہوئے رد عمل دے آرڈر دا تعین کرݨ دا ہک نواں طریقہ بیان کیتا تے کیمیائی توازن تے تھرمو ڈائنامکس دے قوانین لاڳو کیتے ۔ انہاں کیمیائی ایفنیٹی دا جدید تصور وی پیش کیتا ۔ 1886 اچ ، انہاں پتلے محلولاں تے گیساں دے رویے اچ ہک مشابہت ݙٹھی ۔ 1887 اچ ، انہاں تے جرمن کیمیا دان ولہیم اوسٹوالڈ ہک با اثر سائنسی میگزین دی بنیاد رکھی ۔ انہاں سوانٹے آرہنیئس دے الیکٹرولائٹس دی علیحدگی دے نظریے تے کم کیتا تے 1889 اچ آرہنیئس مساوات دا فزیکل جواز پیش کیتا ۔ 1896 اچ ، او برلن دی پرشین اکیڈمی آف سائنسز اچ پروفیسر بݨئے ۔ سٹاسفورٹ اچ لوݨ دے بھنڈاراں دا ایندا مطالعہ پرشیا دی کیمیائی صنعت اچ ہک اہم ݙات ہائی ۔

وین 'ٹ ہوف یوٹریچٹ دے ویٹرنری کالج اچ کیمسٹری تے فزکس دے لیکچرر بݨئے ۔ ول انہاں تقریبا 18 سال تئیں ایمسٹرڈیم یونیورسٹی اچ کیمسٹری ، معدنیات تے جیولوجی دے پروفیسر دے طور تے کم کیتا تے آخر کار کیمسٹری ڈیپارٹمنٹ دے چیئرمین بݨئے ۔ 1896 اچ ، وین ٹ ہوف جرمنی لݙ ڳیا ، جتھاں انہاں 1911 اچ برلن یونیورسٹی اچ اپݨا گزر گزران ختم کیتا ۔ 1901 اچ ، انہاں کوں محلولاں نال کم کرݨ تے پہلا نوبل انعام ملیا ۔ ایندے کم توں پتہ لڳا جو ٻہوں پتلے محلول ریاضی دے قوانین دی پیروی کریندن جیڑھے گیساں دے رویے کوں بیان کرݨ والے قوانین نال ٻہوں ملدے جلدے ہن ۔

آدر تے ایوارڈ

1885 اچ ، وین ٹ ہوف کوں رائل نیدرلینڈز اکیڈمی آف آرٹس اینڈ سائنسز دا ممبر مقرر کیتا ڳیا ۔ 1904 اچ ، او امریکن فلاسوفیکل سوسائٹی دے ممبر دے طور تے منتخب تھیا ۔ ٻئے اعزازات اچ ہارورڈ تے ییل (1901) ، وکٹوریہ یونیورسٹی ، یونیورسٹی آف مانچسٹر (1903) ، تے یونیورسٹی آف ہائیڈلبرگ (1908) توں آنریری ڈاکٹریٹ شامل ہن ۔ انہاں کوں 1893 اچ رائل سوسائٹی دا ڈیوی میڈل (لی بیل دے نال) ݙتا ڳیا ، تے 1897 اچ رائل سوسائٹی (ForMemRS) دا فارن ممبر منتخب کیتا ڳیا ۔ انہاں کوں پرشین اکیڈمی آف سائنسز دا ہیلمہولٹز میڈل (1911) ݙتا ڳیا ، تے 1894 اچ فرانسیسی لیجن آف آنر دا نائٹ تے 1911 اچ قیصر ولہیم-گیسلشافٹ اچ سینیٹر مقرر کیتا ڳیا ۔ وین ٹ ہوف لندن دی برطانوی کیمیکل سوسائٹی ، رائل نیدرلینڈز اکیڈمی آف آرٹس اینڈ سائنسز (1892) ، امریکن کیمیکل سوسائٹی (1898) ، پیرس دی اکیڈمی ڈیس سائنسز (1905) ، تے نیدرلینڈز کیمیکل سوسائٹی (1908) دے آنریری ممبر بݨئے ۔ اپݨے ٻہوں سارے اعزازات اچوں ، وین ٹ ہوف کیمسٹری اچ پہلا نوبل انعام جیتݨ کوں اپݨے کیتے پورہیئے دی انتہا سمجھیا ۔ ہیٹھ درج چیزاں انہاں دے ناں تے رکھیاں ڳئیاں ہن:

وین 'ٹ ہوف فیکٹر وین ٹ ہوف مساوات لی بیل–وین 'ٹ ہوف اصول

14 مئی 2021 کوں ، سیارچہ 34978 وین ٹ ہوف ، جیڑھا فلکیات داناں 1977 اچ پالومار–لیڈن سروے نال دریافت کیتا ہا ، انہاں دی یاد اچ انہاں دے ناں رکھیا ڳیا ۔