جیجھا دیس اوجھا ویس

اَکھاݨ اے ’’جیجھا دیس اوجھا ویس‘‘، ہر قوم دے اپݨے اپݨے لباس تے اپݨے ویس ہوندن ، غریب سادہ پیندن تے ہنڈیندن ۔ امیریں  دی اپݨی دھج ہوندی اے ، عام طور تے وسیب دے لوک پٹکا ، چولا تے کھسہ پیندے ہن ۔ امیر لوک طلے آلے کھسہ تے مہانگی ململ دے کڈھائی آلے چولے پیندے ہن ، پٹکے طریٰ اُچا ہوندا ہا ، پٹکے کوں  مایا ݙیندے ہَن، میں  اپݨے ابّے کوں  ساری حیاتی پٹکے نال ݙٹھے ، مونڈھے تے چادر رکھیندے ہن ، چھیکڑی عمر ءِچ اُنہاندے ڳل ءِچ فریدی رومال ہوندا ہا ۔ سیالے کوں  اُن دی لُکار ہوندی ہئی ۔ کپڑے دے تھان ہوندے ہن کوئی گزبر تے کوئی ݙڈھ گز بر۔ابا سئیں  اپݨی دکان تے کپڑا رکھیندے ہن ۔ رنگ رنگ دے کپڑے ہوندے ہن ، بوچھݨ کوں  ݙلا سݙیندے ہن ، شادی تے عورتاں  ݙلے شہروں  رنگویندیاں  ہن ۔ غزانے نال کپڑے دی کاچھی ولچھی تھیندی ہئی ، پپلین ، کارالین ، لٹھا ، لدھاݨا ، کورا ، لٹھا ، ململ ، کھدر ، تے ایہو جہے ٻے کپڑے ہوندے ہن ، عورتیں  سانگے شنیل تے شفون وی ہوندے ہن ۔ وݙے آکھدن جو پہلے کپڑے ہتھ نال سویندے ہن ، اساݙے ویلے درزی ہن ۔ کچھ ولچھ کرتے درزی مقراض نال کپڑے کپیندا ہا ، پہلے تاں  کوناں  ہئی اسیݙے دور ءِچ ستھݨ آ ڳی ہئی ۔ سکولی ستھݨ سیویندے ہن تے نوکری آلے وی ستھݨاں  سیواوݨ پئے ڳے ہن ۔ درزی اپݨی انچی ٹیپ ہر ویلے ونڄائی بیٹھا ہوندا ہا ۔عورتیں  دے گھگھرے ہوندے ہن اساں  ݙاݙی نانی کوں  گھگھرا پیندا ݙٹھے ۔ عورتاں  وی گھر ءِچ کپڑے سیندیاں  ، ماسی فتح خاتوں  تے ماسی نوراں  کپڑے سیندیاں  ہن ۔ ماسی نوراں  پٹویندی ہئی ۔ آکھدن حمید قصائی دا ابا عبدالغفور بہشتی وݙادرزی ہا۔

حوالہ

کتاب: مُہاڳ، مصنف: ظہور احمد دھریجہ ، ناشر: جھوک پبلشرز ، ملتان