جہانیاں جہاں گشت دا قول

حضرت جہانیاں جہاں گشت دی پیدائش 707 ہجری اے ۔ آپ نے اپݨے چھوٹے بھرا راجہ قتال دے حق وچ فرمایا ہا جو ’’ اساں خوجے تُساں راجے ‘‘۔

چنانچہ سرائیکی زبان دا ایہ فقرہ وی جمعات شاہی ( ملفوظات حضرت شاہ عالم ؒ ) وچ محفوظ ہے۔ خود حضرت قتال فیروز شاہ تغلق دی مزاج پرسی انہاں الفاظ وی کیتی ہئی:’’کاکا فیروز چنڳا ہے ‘‘ ۔انہاں توں علاوہ سرائیکی زبان تے ادب دے لٹر یچر دے ہزاراں پراݨے نمونے مل ویندن جتھوں ظاہر تھیدنے جو سرائیکی اڄ دے پاکستان دے تمام علاقیاں دی مرکزی زبان تے عام ٻول چال دی زبان ہئی ۔ سندھ دے حریت پسند ہوشو شیدی دا تاریخ ساز نعرہ ’’ سر ݙیسوں ، سندھ نہ ݙیسوں ‘‘خالص سرائیکی وچ ہے ۔ اتھوں پتہ لڳدے جو سرائیکی خطے دے اصل وارث اے او غیرت مند لوک ہِن جیڑھے سر ݙیندن پر دھرتی نی ݙیندے ۔

حوالہ

کتاب: میݙی دھرتی، میݙے لوک ، مصنف: ظہور احمد دھریجہ ، ناشر: جھوک پبلشرز ، ملتان 2018ء