جھوک سرائیکی تے حیاتی دی پہلی رات تحریر سوجھل بخاری

جھوک سرائیکی ملتان تے حیاتی دی پہلی رات

22 جنوری 2026 جمرات دے ڈینھ کوں جھوک سرائیکی ملتان سئیں ظہور احمد دھریجہ دی دعوت تے غارتگران ملتان مردہ باد کانفرنس وچ شرکت سانگے گیم تاں پروگرام شام کوں 4 وجے شروع تھیونڑاں ہا خیر پروگرام دی تھتھ بدھیجی تاں سرائیکی زبان و ادب دے مہمان لوک وڈیاں وڈیاں ہستیاں ایں کانفرنس وچ موجود ہن۔ جیندے وچوں سئیں ظہور احمد دھریجہ سئیں پروفیسر ڈاکٹر مقبول حسن گیلانی سئیں پروفیسر پرویز قادر سئیں(سرائیکی وکی پیڈیا) مرشد سید مطلوب بخاری سئیں مرشد سید سبطت شاہ شمسی سئیں سئیں شاہنواز جانگلہ ایڈووکیٹ سئیں ملک جاوید چنڑ ایڈووکیٹ سئیں شعیب نواز خان بلوچ سئیں چاچا شریف خان لاشاری سئیں سئیں اشرف حسین پٹھانڑیں خان سئیں مظہر جاوید کات سئیں اختر دلنور نور پوری سئیں عدنان خان لنگاہ دے نال نال دیگر لوگ وی ایں کانفرنس وچ موجود ہن جنہاں وچوں کجھ دے نانواں توں میں واقف کیناں ہم

سرائیکی اگوانڑاں دیاں تقریراں تے میڈی شاعری ایں کانفرنس دا حصہ ہئی۔

پروگرام اجاں جاری ہئی ایں دوران محمکہ موسمیات دی پرڈکشن دے عین مطابق ملتان تے گردونواح وچ بارش تھیونڑی ہئی تاں مینہ وسنڑ شروع تھی گیا تے ول وسدا ہی ریہا رکنڑ دا ناں ای گدس خیر کانفرنس اپنڑیں اختتام کوں پجی تاں رات دے 7 وجدے پے ہن۔ دھریجہ سئیں نے آپنڑیں خدمت گزاریں کوں حکم ڈتا جو لنگر چا آوو مٹراں تے آلواں دے نال چاول پکیئے پئے ہن ٹھڈھے ٹھڈھے موسم وچ گرما گرم چاولاں نے بہوں چس کرا ڈتی تے مینہ اونویں وسدا کھڑا ہا۔ چاول کھا گدے تاں جھوک دے خدمت گزار چاہ چا تے آگئے ول ساری سنگت نے چاہ پیتی گالھ مہاڑھ وی تھیندی رہی۔بارش کجھ رکی تاں سنگت نے وی واری واری نکھرنڑ شروع کر ڈتا دوست احباب اپنڑیں اپنڑیں گھراں دو روانے تھی گے۔ ظہور دھریجہ سئیں، اختر دلنور، اشرف پٹھانڑیں خان، جھوک دے خدمت گزار تے میں جھوک تے موجود ہاسے مینہ اجاں وی کنڑ منڑ لائی کھڑا ہا میں دھریجہ سئیں کنوں ونجنڑ واسطے اجازت منگیم تاں انہاں اجازت نہ ڈتی اکھیونے سوجھل سئیں موسم خراب ہے تساں اتھائیں ٹک پووو خیر میں وی انہاں دی گالھ من گدی تے جھوک تے ٹک پیئم میں آپنڑیں زندگی دے کئی شاندار ڈینھ جھوک سرائیکی تے گزار چکیا ہاں پر زندگی دی پہلی رات ہئی جیڑھی میکوں جھوک سرائیکی تے گزارنڑ نصیب تھئی ھے میں اینکوں اپنڑیں خوش نصیبی سمجھدا ہاں۔ ایں رات دا احوال کجھ ایں ھے جو مینہ دی وجہ کنوں لائٹ کیناں ہئی موبائل فون دیاں بتیاں نال اوکھے سوکھے گزارا کیتوسے جیڑھے کمرے وچ ستے پے ہاسے اوندے وچ چار چفیروں کتاباں ای کتاباں لاتھیاں ہن کافی دیر گالھیں کیتوسے تے ول سم گیوسے۔ اللہ سئیں دے حکم نال سویل تھی گئی فجر دی نماز ادا کیتوسے نماز توں فارغ تھیونڑ توں بعد سویلے سویلے قرآن دی زیارت تے تلاوت دی منڈھ لا کنوں عادت ہے قرآن دی تلاوت دا ارادہ کیتم تاں ڈٹھم دیگر کتاباں دے وچ سردارالکتب قرآن کریم اپنڑیں شایان شان موجود ہا۔

اگاں ودھیم قرآن مجید کوں چاونڑ کیتے تاں قرآن مجید دی زیارت کریندیئیں بہوں شاندار خوشی تھئی کیوں جو قرآن مجید سرائیکی ترجمے والا ہا ایندے ٹائٹل صفحے تے لکھیا اویا ہا

"

سوکھے سرائیکی ترجمے آلا قرآن مجید

"

اینکوں چاتم سینے لایم بہوں سکون محسوس تھیا ظہور دھریجہ سئیں کوں ڈھیر دعائیں کیتم بہوں خوشی تھئی جو ہووے جھوک سرائیکی جتھاں سرائیکی زبان و ادب دیاں لکھاں کتاباں موجود ہونون تے جھتوں لکھاں کتاباں چھپدیاں پیاں ہونون اتھاں اے کیویں تھی سگدے جو ام الکتاب قرآن مجید سرائیکی ترجمے والا ناں ہووے ہیں گالھ تے بہوں فخر محسوس تھیا جو واقعی سئیں ظہور احمد دھریجہ سرمایہ اے سرائیکی ہن، محسن سرائیکی ہن، فخر سرائیکستان ہن ایہ عظیم کارنامہ وی انہاں دے ہتھوں تھئے پروفیسر دلشاد کلانچوی سئیں نے قرآن مجید دا جو سرائیکی ترجمہ کیتا ہئی سئیں ظہور دھریجہ نے اوں قرآن مجید دا سرائیکی مقدمہ لکھیئے ول اینکوں نویں سرے توں چھپوائے نیں بہوں سوہنڑیں تے دل چھیکویں رنگاں نال ایندا ٹائٹل پیج بنڑوائے، ایندی جلد بہوں سوہنڑیں، مضبوط تے شاندار ہے۔ اندرلے صفحات بہوں سوہنڑیں تے پیارے ہن۔ بے شک اے عظیم کارنامہ ہے دلشاد کلانچوی سئیں کوں ظہور دھریجہ سئیں کوں تے ایں کار خیر وچ جئیں جئیں وی حصہ رلائے انہاں ساریاں کوں ایندا ثواب راہندی دنیا تئیں ملدا راہسی تے بروز حشر ایہ کارنامہ انہاں ساریاں کیتے ذریعہ نجات بنڑسی انشاءاللہ آمین۔

اساں وی جے چاہوں تاں ایں کار خیر دا حصہ بنڑ سگدے ہیں

میں دعا کرینا جو اللہ کریم آپاں ساریاں کوں اے توفیق ڈیوے جو آپاں سارے اے شاندار نسخہ "سوکھے سرائیکی ترجمے والا قرآن مجید" جھوک سرائیکی توں ہدیہ ڈے تے گھنوں اینکوں خود وی پڑھوں تے اپنڑیں بالاں کوں وی پڑھاوں آمین۔ ایندے نال نال میں سرائیکی اگوانڑاں کوں، سرائیکی لکھاریاں کوں، سرائیکی شاعراں کوں تے سرائیکی دے طالب علماں کوں ایہا اپیل کریساں جو تساں سارے ایں سرائیکی ترجمے آلے قرآن مجید کوں جھوک سرائیکی توں گھنوں تے ہر کہیں دے گھر ایہو قرآن مجید ضرور ہووے کیوں جو آپاں سرائیکی ہیسے تے سرائیکی ہوونڑ دا ثبوت وی ڈیوں شکریہ جزاک اللہ خیر۔

خیر خواہ: سوجھل بخاری