جھاوریاں

تحصیل شاہ پور تے ضلع سرگودھا دا قصبہ ۔ دریائے جہلم دے کھبے پاسے واقع ہے۔ شیر شاہ سُوری دی تعمیر کردہ سڑک نال ایں شہر دا رابطہ شاہ پور تے تاریخی قصبہ بھیرہ نال ہے۔ بھلوال روڈ توں سرگودھا نال رابطہ ہے ۔ہک روایت ہے جو اتھاں ٻہوں ساریاں جھاڑیاں تھیندیاں ہن۔ ایں سانگے ایں جھاہ دا ناں ’’جھاوریاں ‘‘ پے ڳیا۔اے ہک تاریخی قصہ ہے۔ اتھاں ہندوئواں تے سکھاں دی چھوڑی ہوئی قدیم عمارات وی موجود ہن ۔ جنہاں اِچ ’’جنج گھر‘‘ مشہور ہے ۔ شیر شاہ سُوری دی تعمیرکردہ مسیت انگریزاں دا تھانہ تے ہائی سکول وی تاریخی حیثیت رکھدن۔ شہر دے اَدھ اِچ ہک قدیم قلعہ وی ہا جیندے آثار ہُݨ کائنی۔جݙاں جو مائی صاحبہ دا دربار ٻہوں پُراݨا ہے ۔ جھاوریاں دے شمال مغرب آلے پاسے بزرگاں دی مشہور سلسلہ نقشبندیہ دی خانقاہ بیربل شریف ہے۔ اتھاں پہلے حضرت خواجہ غلام مرتضیٰ 1313ھ تک مساند ارشاد تے فائز رہے۔ ایندے بعد انہاں دے صاحبزادے احمد سعید گدی نشین تھئے۔ مشتاق باسط پنجابی ادیب تے شاعر دی حیثیت نال جٖانڑیے ویندن۔ انہاں دااصل ناں ملک مشتاق احمد ہے ۔سپنی دا ڈنگیا، کچیاں کندھاں، تریڑاں، سچ دے ورقے ، سکھ دا ساہ ، پاک پنجابی ، ہنجواں دا گہنا انہاں دی کتاباں ہن۔جھاوریاں دی آبادی 1981ء اچ 17643جݙاں جو 1998ء دی مردم شماری دے مطابق 23790نفوس تے مشتمل ہئی۔ ہُݨ ایندی آبادی 30ہزار دے قریب ہے۔