جھانولا (شعری مجموعہ)

جھانولا

ادب نال بہوں گھاٹا گانڈھا رکھنڑ آلے تے مٹھی بولی سرائیکی نال سچا پیار کرنڑ آلے نینگر شاعر باقرنیازی دا پہلا شعری مجموعہ "جھانولا " میڈے ہتھاں اچ ھے ۔ ایہہ کتاب میکوں ڈاک دے ذریعے ملی ھے ۔ باقرنیازی دا ناں کہیں تعارف دا محتاج کوئے نی ۔ سرائیکی شاعری پڑھنڑ ، سنڑنڑ آلے باذوق سجنڑ انہاں کوں چنگی طرح جانڑدن ۔

باقرنیازی شاعری دیاں کئ صنفاں اچ پورھیا کیتے تے خوب کیتے ۔ انہاں بہوں تھوڑی مد وچ بہوں وڈا ناں کما گھدے ۔ او اپڑاں زیادہ وقت ادب دی سیوا اچ خرچ کریندن ۔ او اکثر نامور تے کئ نویں نکور شاعراں تے لکھاریاں نال ادبی اکٹھ دا اھتمام کریندن ۔ ول انہاں نال رل تے ادب دی ٹور ٹوریندن ۔ ادب دی اگونہی تے کھنڈاء دی خاطر انہاں دی بھج دھرک دی جتنی وی تعریف کیتی ونجے گھٹ اے ۔

باقر نیازی عام لوکاں وچ اٹھنڑ باھونڑ آلے بہوں سادہ مزاج تے حساس دل انسان ھن ۔ او وسیب تے وسیب وچ وسنڑ آلیاں دے ڈکھ درد دے سنجاپو ھن ۔ انہاں دی شاعری ھر بندے دے دل دے جذبیاں کوں نشابر کریندی ڈسدی ھے ۔ باقرنیازی دی شاعری لاجواب ھے۔ او لفظاں دی چنگی چونڑ، انہاں دا سوھنڑاں ورتاء ، خیالات دی حسن ترتیب تے انہاں کوں بیان کرنڑ دا ڈھنگ جانڑدن ۔

"جھانولا" سرائیکی شاعری دی ھک سوھنڑی تے من مونھڑی کتاب ھے ۔ کتاب دی جلد مضبوط ، کتابت تے چھپائ صاف ستھری ھے ۔ تے کاغذ وی ڈاھڈا معیاری ھے ۔ "جھانولا" میڈے کیتے ویندے سال (2016) دی ھک نویکلی تے نایاب سوغات ھے۔ ایں پیاری سوغات تے میں باقرنیازی سئیں دا تہہ دل نال شکریہ ادا کرینداں ۔ میڈی دعا ھے جو اللہ پاک باقرنیازی سئیں کوں لمبی حیاتی ڈیوے ۔ انہاں دی ایں کاوش کوں رنگ لاوے ۔ انہاں کوں وادھو وادھ قدر تے شان نصیب فرماوے ۔ آمین ۔

دعاگو: منظور اعوان