جوہر لنجواݨی
اصل ناں اختیار احمد
قلمی ناں جوہرؔ لنجواݨی
ڄمݨ 1978ء
تعلیم پرائمری
پیشہ زمیندارہ
جاہ پتہ وستی نم آلی ، عمر کوٹ روجھان، ضلع راجن پور
(1)غزل
[لکھو | ماخذ وچ تبدیلی کرو]اے پاڳل دل توں دردیں دے کہیں کوں حال کیوں ݙیندیں
تیݙے اندر اے پلݨیں ہن توں چپ کر پال ، کیوں ݙیندیں
ملئے ݙکھ ݙات وچ ساکوں ، اساں صدمات وچ راہݨے
نوہی ݙیندا تاں سکھ نہ ݙے اے ݙکھ ہر سال کیوں ݙیندیں
تیکوں سدھ ہے ݙینہاں راتیں جو کالے کال وچ رہندوں
اڳے کیا کال کافی نئیں ، ولا ٻئے کال کیوں ݙیندیں
میکوں اڄ تئیں پرکھ نی تھئی زمانہ چال تیݙی دی
توں ٻلدیاں ٹھار ݙیندا ہیں توں وسمیاں ٻال کیوں ݙیندیں
توں عادل ہیں عدالت دا تاں وت انصاف کیتا کر
اساݙی ڳالھ سُݨ جوہرؔ ولا توں ٹال کیوں ݙیندیں